周柏豪面腫似毒瘤
周柏豪近日不但被是非纏身，先被指因「溝女」辣慶兄弟余文樂，又指他介入「峯語戀」，昨日凌晨更飛來橫禍，凌空「撻生魚」的他左臉着地後爆出一撻血塊，破相後的他更將「爛面照」放上網嚇fans！
歌手周柏豪一向賣靚仔樣，昨日他在社交網站Instagram上載的一張「破相」照就嚇壞一眾fans！從自拍照中可見其左臉頰顴骨位置猶如生了一顆毒瘤，不但紅腫一撻，左耳亦見通紅。事緣柏豪前晚通宵拍攝MV最後一個鏡頭時，導演讓他自由發揮，在片場跳跳紮的他因地上的水彩而跣倒，整個人被拋起後再凌空失平衡墮地撞傷，左臉先着地的他躺在地上動也不動，未知事態嚴重的工作人員還以為柏豪在開玩笑，遲遲未嗌停機。過了半分鐘後仍絲毫不動的他終嚇怕工作人員，以為他跌死了！
阿媽探班嚇親
此時其左臉已紅腫一大舊，剛巧柏豪媽媽當日到場探班，被寶貝仔嚇親的周媽媽嚷着要送他入院檢查，但柏豪依然死撐無事，堅持不肯睇醫生，只敷冰了事。昨日柏豪就憶述當時情況：「其實跌嗰吓有少少暈，好彩係整到面，唔係爆眼，聽日（今日）要飛馬來西亞做電台騷，可能用粉遮一遮。」
否認兄弟反目
另外，近日他被指因搭上籃球隊隊友胞妹，而與隊友余文樂反目成仇，昨日他就在電台電話訪問中直斥報道無聊：「好無稽，唔係事實唔回應喇，費事炒作。」他與樂仔先後缺席球賽只因與工作撞期，並非兄弟決裂。另外，有傳吳千語情傾於他，柏豪就指與千語和林峯都是朋友關係，他說：「冇發生過咩事，兩星期前我先同千語去澳門做嘢，新年都會同佢哋SMS。」
文：音樂組