周迅開腔 否認戀霆鋒
影壇「三大型男」劉青雲、古天樂及吳彥祖與影后周迅前晚出席電影煞科宴，與謝霆鋒和梁朝偉傳緋聞的周迅明顯早有準備，以兩句話來否認傳聞，不過再追問她詳情時就不欲再多談兩位緋聞男友，更即刻彈開走人。
劉青雲、古天樂及吳彥祖與周迅前晚出席電影《竊聽風雲3》煞科記者招待會，近日與謝霆鋒和梁朝偉傳緋聞的周迅明顯有備而來，她說：「我知道你哋會問呢個問題，我兩句就可以交代晒，第一，我今次嚟香港唔係為咗梁朝偉，而係為咗拍《竊聽風雲3》，第二我拍完戲聽（今）日就走，亦唔係為咗要避開同謝霆鋒嘅緋聞，而係要去拍電視劇《紅高樑》。（同霆鋒住同一座大廈？）係，大家都有撞過，不過冇一齊食過飯。」
問到二人是否拍拖時，她說：「唔係，係朋友。（冇機會一齊？）我已經講咗，唔講喇！」她又表示知道霆鋒搬家的消息，問她下一部戲是否會和霆鋒合作時，她說：「係。」但當記者欲再詢問時，她已經從座位站起，然後雙手合十說：「我已經講完，OK，多謝。」然後離去。
古仔鍾意小朋友
而曬到變「黑炭」的古仔就笑說：「周迅喺我身邊最開心，因為影得佢白啲，美白產品都唔使用，拍戲嗰陣曬到一舊雲都冇，不過好彩我對手劉青雲都係一個黑人。（同周迅多對手戲？）唔多，我同葉璇先係一對，不過好少見，亦冇Kiss戲，主要都係同吳彥祖對戲。」他又透露跟剛為人父的吳彥祖之間的話題都是圍繞其女兒：「我都打算遲啲買嘢畀佢個女。（羨慕佢有個女？）比羨慕更羨慕。（自己都想生番個？）我係鍾意小朋友，但都要睇時間啱先。（依家啱？）幾點呀依家？通常呢啲都係夜晚發生，唔會喺日頭。」
文：影視組