金剛為蕊蕊出頭 寸Avis奀星無風度
周秀娜舊愛陳偉成（Avis）被美味天使「柑桔」蕊蕊踢爆有一腿兼花心，但「劇情」峰迴路轉，蕊蕊被指戀上金剛，金剛照單全收之餘，更寸爆Avis是奀星撐女友，不用借他宣傳。至於Avis亦自爆有圈內新歡，四角關係立立亂！
周秀娜舊愛Avis日前被指與蕊蕊暗撻半年，女方於微博指「信錯人」而斬情絲，Avis否認及怒斥女方抽水博宣傳，更火速晒「新女友」照片上微博！事隔48小時，兩位男女主角竟分別爆出另一半，蕊蕊新歡是金剛，Avis卻以公仔圖案遮掩是圈中人的女友樣貌，關係搞到七國咁亂，四角關係隨即爆發罵戰！
欣賞冇港女性格
女主角蕊蕊昨日被踢爆跟金剛暗撻四個月，有指二人更密遊台灣見金剛家長，事後二人亦承認發展中。昨日金剛接受電話訪問，對於與蕊蕊被Avis鬧爆，他即護花開口怒斥Avis，更以「陳生」稱呼對方，暗寸對方唔夠紅。他激動地說︰「我有留意佢哋嘅新聞，唔明點解有個男仔可以咁講嘢？我識嘅蕊蕊係好低調嘅人，如果要搵宣傳唔使搵你陳生！」他直言曾與Avis合作電影，但並不相熟，亦不會向蕊蕊過問這件事。
金剛又讚到蕊蕊天上有地下無︰「呢個女仔性格好好，好獨立，男仔頭，唔係嗰啲港女性格。」問是否發展中？他甜絲絲默認戀情︰「我哋互相了解中！我唔介意公開，我又唔係偶像派，互相有好感好正常。」至於如何冧掂蕊蕊？他謂︰「誠意最緊要，我都好有心思，佢樣靚性格好好。」不過他強調沒與女方同居︰「我哋只係住喺同一棟，我自己住，佢同家姐住。」問會否上蕊蕊閨房作客？他笑說︰「唔係咁好，如果佢家姐着得好性感會好驚。（蕊蕊着得性感呢？）如果佢肯着得性感喺我面前，我就好開心喇！」
另一主角Avis昨日於微博和Facebook公開新戀情，並上載與女友合照，不過刻意用公仔圖案遮掩女友樣貌，未能知道女方真正身份。Avis寫道︰「其實我現在真的好幸福，沒你們想到那麼××，希望8號風球將我身體所有垃圾謠言吹走，懂我的人不用多說，不懂我的人請你回家照鏡吧。」更於Facebook感情狀態改為「戀愛中」。對於被蕊蕊新歡金剛開火炮轟，Avis昨日於電話中懶理對方︰「唔想再講。」其後拋出一句「祝佢哋幸福囉」贈興。對於蕊蕊的新戀情，他亦寸嘴說︰「佢講啲嘢都幾矛盾，佢嘅嘢唔關我事，唔想講。」
Avis拒透露身份
Avis又稱與新歡拍拖近兩個月︰「佢係圈中人，本來唔想公開，但早幾日嘅新聞好冤枉，所以同女朋友商量後公開戀情。」但他不肯透露女方身份︰「我同佢識咗好耐，拍咗拖一、兩個月，佢係邊個唔講喇！」至於女主角蕊蕊至截稿前仍未回覆，不過卻在微博繼續抒發感受，她先寫道︰「還要我傷多少次才夠？」未知講的是否Avis，及後又留言︰「清楚了、明白了，有些人有些事不值得我們浪費時間，不用再說大家都知道。」
文︰專案組