許靖韻孭飛 七吻獻「關公」
英皇力捧新人許靖韻（Angela）有份參與的微電影《歲月如歌》昨日煞科，孭重飛的Angela首次拍微電影就獲厚待，在電影中一親師兄羅力威「香澤」。提到獻出螢幕初吻，Angela自爆原來劇本更激：「最初我哋要咀嘴，但我哋兩個都抗拒，所以改做由我錫師兄面珠。」而羅力威未知是否機會難得，一場錫面戲竟NG了七次，Angela更踢爆師兄拍攝時變成「關公」：「NG咗七次，連啲工作人員都笑佢，搞到佢面紅晒，（羅力威特登？）哈哈，唔係啩！個鏡頭要Hold幾秒，我都冇計。」
拍戲感覺溫暖
Angela又表示和一眾師兄姐拍戲充滿歡樂：「我同羅力威、洪卓立、衛詩雅有場戲要講對白，但大家都忍唔住不停笑，導演仲話啲NG片段可以剪成一套戲。」她又大爆平時木木獨獨的羅力威私底古靈精怪：「我對住羅力威成日忍唔住笑，次次拍我大頭嗰陣，佢都對住我做騎呢樣，下次做戲唔可以望佢。」Angela稱這次和一班師兄師姐拍戲好開心，感覺就像一家人般溫暖。
提到這次英皇落重本斥資百萬，又出動民航機及酒店拍攝，作為新人的Angela會否感到有壓力？她說：「都有少少壓力，不過吳雨大哥來探班都唔係好嚴，佢都冇畀壓力我，但我覺得自己仲有改善空間。」Angela又笑言要請一眾師兄師姐食餐勁慰勞他們，豈料他們竟獅子開大口要食兩餐，認真老實不客氣！
文：音樂組