陳靜賠錢第1波 被追百萬
陳靜（DaDa）日前宣布「閃退」惹起軒然大波，其「罷拍」三日的電影《喜愛夜蒲3》，導演錢國偉決定向她追討100萬賠償。而對DaDa大感失望的經理人施念慈，踢爆DaDa前晚曾致電公司同事喊住認錯，並承諾不會再犯，然而她昨日又缺席電影謝票活動，看來索償事件隨時陸續有來。
日前自稱因情緒病宣布退出幕前的陳靜，連日來缺席多個活動及拒絕演出由她擔正的電影《喜愛夜蒲3》，但前日又秘密為彭浩翔另一電影客串，據知DaDa失場令《喜3》停工3日，而日前原定安排過百演員跳舞的一場重頭戲要取消，故導演錢國偉和監製伍健雄決定向DaDa追討100萬賠償，錢國偉亦決定抽起DaDa的戲份。
曾致電同事認錯
據知，DaDa的公司同事上周五曾致電氹她為電影埋位，之後她以WhatsApp回覆公司說：「不接受任何工作通告。」但翌日又為彭導電影開工，至晚上她又親自致電給經理人公司同事哭着道歉，指事件因她任性引起，影響了很多人，又對唔住公司同事，保證以後不再犯。
不過，DaDa昨日又缺席電影《重口味》謝票活動，對此施念慈說：「佢認錯係尋日（前日）嘅事，今日（昨日）全公司同事又搵唔到佢，佢冇直接向我表達過，唔知佢諗乜同搞乜，唔知佢嘅知錯係咪得一日。」
錢國偉前晚出席雷頌德澳門騷時表示DaDa應清楚交代事件，問可有發覺她不開心？他說：「冇見到，佢又一齊試造型、對稿同拜神，如果有應該一早講，一句嘢唔講就走，真係撲朔迷離！（怕唔怕佢做傻事？）佢梗係唔會，記招嗰日仲玩得咁開心。」對於DaDa道歉，錢國偉昨說：「佢應該親自交代，咁先可以向損失嘅電影公司同經理人交代，至於保唔保留佢角色，要交畀監製決定。（你想唔想？）我目前處理緊其他戲份，佢條線我已經抽起咗。」
另外，邵音音等昨出席《重口味》謝票活動，提到DaDa閃退，音音姐稱怕會鬧她放棄而不敢致電慰問，並指做了一半的工作道義上應完成。對於DaDa或要賠千萬給經理人施念慈，音音姐說：「對DaDa嚟講，依家搵到嘅錢畀番佢（經理人）都好容易，因為佢唔係為錢。」
莊思敏斥不專業
莊思敏昨出席活動時則認為DaDa選擇性接工作不專業，對於有指DaDa不滿被公司擺上枱幫師妹宣傳，莊思敏說：「做人要飲水思源，佢當日都係同其他人有新聞而令人認識佢。我識施念慈，佢對每個女仔都公平。」
文：專案組