關楚耀勤做Gym「Man爆」晒胸
歌手關楚耀（Kelvin）為了即將舉行的個人演唱會，不惜忙於做Gym操Fit自己，務求個唱當天向觀眾大晒「巨肌」！而Kelvin又表示在身形上最不滿意胸部，不過卻笑言契爺譚詠麟最愛摸他胸，足見二人老友鬼鬼！
關楚耀（Kelvin）入行六、七年，終舉行首個個人演唱會！為隆重其事，Kelvin更不惜日以繼夜苦練做Gym Keep fit，務求在演唱會向觀眾展示出「Man爆」肌肉，他說：「最近忙緊練大隻，一嚟因為夏天，都想自己嘅身材美好啲，二嚟9月會有我首個個人演唱會，所以對呢件事特別緊張！其實依家做歌手唔係一件容易嘅事，除咗唱歌好聽呢啲基本嘢外，騷吓肌肉更加係家常便飯，咁所以都要操番吓！」
操Fit電歌迷
雖然Kelvin現時身形不俗，不過他卻自嘲胸部的不足，更說：「個胸唔太滿意，因為唔夠勁！你知依家嘅觀眾，睇慣咁多好嘢，所以都要努力操fit！」而問他除了騷肌外，個唱中還會出甚麼撒手鐧給歌迷驚喜？Kelvin即笑說：「當然唔止唱歌同勁歌熱舞咁簡單啦，我會做一樣入行以嚟從未做過嘅事，但暫時唔講得住！」
阿倫愛摸胸
而提到入行至今的恩師，Kelvin不得不提契爺譚詠麟（譚校長），除了不時給他意見外，更大爆對方經常摸他的胸：「雖然未知譚校長有冇時間做我嘅演唱會嘉賓，但都一定會請佢嚟睇騷！其實入行到依家，佢都好支持我，經常畀我唔同意見，同埋每次見到我，佢都會好親切咁摸吓我個胸！」
文：專案組
攝：黎志輝
場地：Cafe Zense