歌手劉雅麗昨日為唱片公司拍照時，表示新歌唱出入行廿年的心路歷程，她又笑言自己未玩完：「入行廿年未玩夠，都慶幸自己未玩完，仲enjoy工作。」問到她入行廿年可有經歷低潮？她說：「有試過仆喺度，1997嗰年係低潮，個樓市冧，自己當時有兩層樓喺身，有一層畀銀行收番，變咗負資產，試過問高志森借糧，10萬10萬咁借，好在未破產。」
