小方攬女暈陀陀 DaDa硬食撩陰爪
影星方力申及陳靜（DaDa）等前晚錄影獎門人節目大玩爆笑遊戲，期間轉到頭暈暈的小方抱起DaDa時，疑出「撩陰爪」抓到女方下身，DaDa再被連環重摔落地，即時痛至面容扭曲，相當淒慘！
方力申、陳靜（DaDa）、余文樂、彭浩翔、雨僑及曾國祥等前晚錄影《超級無敵獎門人終極篇》，被「獎門人」曾志偉及眾獎老狂寸，其中樂仔被寸：「風吹雞蛋殼，財散余文樂，佢除咗成日買新車，仲係鞋王，成日買新波鞋。」志偉更笑他「正職是溝女」，樂仔則大方稱「預咗被玩」。
眾星玩遊戲時鬧出不少笑話，玩障礙賽時，小方要自轉多個圈，其後抱起DaDa再將她掟落地壓爆氣球，未知是否轉到頭暈，他竟誤出「撩陰爪」，疑似碰到DaDa下體！其後雨僑、小肥加入捉住DaDa手腳，再將她重摔落地，令DaDa痛得面容扭曲！至於曾國祥獲父親志偉「包庇」，邊唱歌邊數銀紙時高唱「世上只有爸爸好」，志偉即冧爆讓他過關，非常搞笑！
否認秘娶Stephy
事後DaDa表示不覺被小方觸及敏感部位：「遊戲碰撞少不免，掂到都唔係有心，當時只係掛住玩，我都唔知邊個位壓爆個波，總之就周身痛！」此外，小方否認與女友鄧麗欣（Stephy）沖繩秘婚：「冇傾過，我係浪漫嘅人，結婚冇得傾嘅，要有衝動先有驚喜，都未諗清楚點安排。（未認定Stephy？）唔好畀我咁多壓力，男人受唔起壓力嘅。」但他直言想到英國古堡或馬爾代夫結婚，並一定會補擺喜酒。
文：影視組