名媛Paris Hilton 5年前被爆竊劫去價值逾千萬港元珠寶，前日留言爆出上周又遭幾個女賊「光顧」寓所，混入其派對偷衫及手袋！莫非女賊從早前上映有關童黨入Paris屋爆竊的電影《閃閃靚賊》（The Bling Ring）偷師？
近日四圍飛宣傳個人品牌手袋的Paris前日於twitter留言大嘆黑仔，爆出又再有賊入屋偷其個人品牌的新系列手袋，邊呻邊曲線宣傳旗下手袋夠吸引。
據悉Paris上周末趁飛到西班牙前於美國加州馬利布大宅搞派對，由於派對大型兼賓客眾多，一向守衞森嚴的寓所頓變「無掩雞籠」，一班女賊疑魚目混珠扮賓客，趁機走入Paris房，偷去Paris的手袋、比堅尼和掛畫，不過慌張離場時就邊走邊跌贓物，被眼利賓客發現，執起贓物交由警方處理，不過現時仍未捉到疑犯，Paris可謂樂極生悲。
家財萬貫的Paris一向深得盜賊歡心，早於2008年就被入屋爆竊，當年曾有Bling Ring童黨成功入屋爆竊，被捕後更爆出Paris會將鎖匙放於門墊下，甚至不上鎖，「幫手」助賊入屋。而當年年尾又有一蒙面男子於清晨五時偷偷潛入Paris位於荷里活山的大宅，闖入其房間，劫去價值逾1500萬港元的珠寶首飾並成功逃脫，Paris當日因外出為歌手Christina Aguilera慶祝生日而逃過一劫，據悉當日大宅亦未有上鎖，難怪三番四次吸引賊人到訪。
雖然她事後「學精」加強保安，用雷射科技，加上警鐘和全天候當值的保安，不過今次仍因開P引賊入屋。事實上，兩個月前於英美等地上映的電影《閃閃靚賊》亦有講及Paris於2008年被爆竊一事，未知一班女賊有否存心偷師。
文：外娛組