張苡澂慘遭逼拍裸照
近日o靚模裸照風波引起關注，歌手張苡澂昨為水着模特兒比賽活動擔任評判，並自爆曾遭逼拍裸照，勸喻想入行的女生要謹慎。張苡澂指該名攝影師頗有名，特徵是駝背，她續說：「呢件事都發生咗幾年，嗰陣啱啱入行，畀錢搵佢幫自己影啲造型照，我帶咗化妝師同形象指導師，點知去到佢趕我啲化妝師走，話要用佢嘅化妝師，跟住又叫埋佢個化妝師走，之後就話要同我影裸照，好在我醒目，戴番副黑超，用假髮遮住自己個胸，下身就着牛仔短褲！」
記者問張苡澂何以感到奇怪還讓對方拍照？她解釋說：「因為已經畀咗錢，同埋啱啱入行唔敢出聲，後來啲相都係我啲model朋友幫我攞番，佢正一人渣，如果畀我知道佢登啲相出嚟，我一定告到佢甩褲！」