陳靜謝票派有味紙巾

陳靜（DaDa）、衛詩雅與關楚耀等，前晚為電影《重口味》到旺角謝票，DaDa雖然以密實連身裙上陣，但就大派印有烏龜頭圖案的濕紙巾來宣傳，適逢邵音音、彭浩翔等在隔鄰影院，為另一齣電影謝票，DaDa透露將與彭浩翔合演微電影：「彭導係男主角，冇份執導，故事藉糞便帶出溫情，但彭浩翔鍾意真實，唔知使唔使用真大便拍。（驚玩屎破壞女神形象？）我唔係女神，最緊要觀眾開心！」

衛詩雅多人追

而衛詩雅於戲中令關楚耀神魂顛倒，現實生活她亦令中外人士着迷，衛詩雅稱日前有外籍人士留字條給她希望做朋友，之後在港鐵車廂又遇普通話少男搭訕，希望取得她的微信聯絡方法，衛詩雅說：「當時好驚，但又有細個被追嘅感覺，好多年冇發生喇，不過最後我用普通話答佢『不可以』；至於個外籍人士，因為我唔鍾意西人，佢唔係我個type！」孫佳君則指近十年來首次到戲院謝票，飾演按摩女郎的她透露戲份意識大膽，她又透露曾想開按摩店，但發現在香港經營皮費不輕，只好暫時作罷。

陳靜落力派「龜頭」紙巾，可惜男觀眾似乎唔想要。	關楚耀連「紙女」都唔放過。	衛詩雅（右）傾得興高采烈。

「小虎」出寫真

此外，DaDa昨日帶同愛貓「小虎」出席另一活動，她表示會效法「尖東貓王」忌廉哥，為小虎推出正能量寫真集，問她會否孖住出寫真？DaDa笑說：「唔出喇，交畀佢接棒。以前出都係想宣傳自己，增加知名度，依家出都冇咗以前嘅意思。」另外，她表示將開拍新片《喜愛夜蒲3》，透露飾演出軌人妻及有情慾戲份。

文：影視組