龍小菌公開減肥血淚史
「脫罩歌手」龍小菌自搣去125磅肥膏，由「龍躉」蛻變成「美人魚」後人氣急升，歌、影、廣告、學界四線發展瓣瓣掂，日前《好報》直擊其「軍訓式」修身過程後，近日再升呢成為「瘦身達人」，籌備寫書分享減肥血淚史，並目標操出六舊「朱古力」腹肌！
中六時體重達到頂峯的龍小菌為健康着想，花了3年時間進行地獄式減肥，成功由250磅「脫脂」至125磅，日前《好報》拍得她跟健身教練到運動場練跑、跳繩、打拳等，操到近乎虛脫的她，僅買香蕉補充體力，她更公開其度身訂造「減肥餐單」，以證健康減肥要雙管齊下，運動及節食缺一不可。昨日小菌接受電話訪問時表示：「近期好多人問我點減肥，鑑於每個人體質唔同，我會介紹自己嘅健身教練畀佢哋識，唔敢亂咁教。」不過，小菌亦樂意分享其減肥心得：「都有出版社同我傾緊出減肥書，寫書對我嚟講冇難度，但詳情未知。」
壯臂最難減
小菌覺得減肥是長久戰，除要勤力做運動、忍口抗美食外，還要有無限堅毅力：「減肥最困難係減到咁上下就會停，我試過有2、3個月，點減都冇瘦到，我呼籲遇上呢個情況時，千祈唔好氣餒，好多人因為咁就食番嘢，結果變得更肥。」問小菌現時的減肥進度？她謂仍在努力中，覺得一雙手臂最難減，可能跟天生骨架大有關，但她有信心壯臂會消失，皆因：「我教練話一定減到，我好信佢。」
拒絕行性感
不少女星成功減肥後，都會急騷「哥利」或擔任纖體代言人再賺一筆，問小菌可會行性感路線？她哈哈笑說：「絕對唔會，因為我另一個身份係老師，我依家最想練出六舊腹肌，不過我會將呢排『朱力古』私有化，只留自己欣賞。」
文：音樂組