鎮宇Chilam 衝上內地 點擊率億億聲
最近「Sam哥」吳鎮宇人氣爆燈，其影帝好友黃秋生接受《好報》訪問時亦讚他演技好，鎮宇打趣回敬鬧秋生時最入戲。而鎮宇與另一機師型男張智霖更紅到內地，劇集點擊率突破一億，認真誇張。
無綫重頭劇《衝上雲霄Ⅱ》播映三星期，「Sam哥」吳鎮宇及「Cool魔」張智霖（Chilam）冧暈萬千粉絲，收視最高達35點。內地方面，頭十一集於網上已突破1億3千萬點擊率，平均每集952萬，評論則達3萬多條，非常誇張。
鎮宇向來演技出眾，影帝好友黃秋生都讚他一秒即可入戲，鎮宇昨日接受電話訪問時笑說：「我只要對住秋生就入到戲，尤其係鬧佢同爆佢嘅戲。」提到前晚一集「Sam哥」當「夏晨」是「Zoe」喊住道歉，成功感動觀眾，他認為效果不錯，但該段時間病到樣腫，自覺不是狀態。
有興趣拍電影版
鎮宇及Chilam昨晚在將軍澳設宴慰勞工作人員，對於有傳無綫及蕭定一爭拍《衝》電影版，兩人均有興趣，但未決定拍哪邊。鎮宇說：「我都係睇梁家樹（無綫高層），佢唔做我先同其他人合作。（同TVB合作機會大啲？）又未必，佢哋要拍一套賀歲片，未必咁快。」提到周潤發想演捧餐Captain，鎮宇笑說：「咁佢人工應該低過我哋，有咩都畀晒佢做。」
對於網友質疑為何角色不跟陳慧珊再續前緣，鎮宇說：「你問編劇，我有咩做咩！之後有同Zoe嘅感情線，會交代前因後果。（觀眾準備紙巾？）毛巾啦！個個都畀心機，兩個女仔都演得好。」他坦言沒收看自己演出，因家中電視太清楚，並笑言第三集最好不要高清，但可拍《衝上雲霄》3D版。
人氣急升的Chilam最近狂被狗仔隊追訪，他惟有減少跟兒子相處。對於角色風流，會否不讓兒子收看？他說：「劇情啫！又唔係打劫，好過唔受女仔歡迎吖！」他又指受劇集帶挈多了有關航空業的工作，但沒有計進帳。他又稱選拍電影版視乎製作及待遇。
吳卓羲開心被讚
此外，鎮宇接受《好報》訪問時指胡杏兒做人不夠輕鬆，杏兒說：「多謝提點，但因為角色唔係咁輕鬆，要謹慎啲。」吳卓羲則被鎮宇讚處世及演技有進步，卓羲笑說：「開心！佢唔會刻意讚，不過都話過我心扉打開咗。」
文：影視組