薛凱琪邀法蘭茲開騷「逃脫」
國際知名魔術師法蘭茲‧哈拉瑞及香港歌手薛凱琪（Fiona）前日在澳門合演一場精彩震撼的魔術表演，法蘭茲曾為多位國際巨星的演唱會加入魔術元素，Fiona事後直言想邀請對方，為日後的個唱演出，而法蘭茲對Fiona亦有讚無彈，看來合作機會相當高！
澳門新濠天地再一次展現超凡娛樂體驗的領導地位，邀請了國際知名的魔術大師法蘭茲‧哈拉瑞（Franz Harary）首度亮相澳門獻技。前日，更同時邀請了薛凱琪聯同法蘭茲在新濠天地戶外湖畔舉行了一場精彩震撼的「Houdini Performance」亡命魔術表演，吸引大批市民圍觀，為「法蘭茲．哈拉瑞大師級魔術世界巡迴匯演」揭開序幕。
吊高十層甚驚險
二人同被吊到十層樓高，然後在木箱內瞬間消失，這種「逃脫術」表演，令台下觀眾看得目瞪口呆。首次參與如此大型魔術表演的Fiona直呼刺激：「我好鍾意睇人表演魔術，有時自己會玩吓，平時嘅魔術只係幻覺，但呢次係逃脫術，有一定危險性，我好鍾意有危險性嘅嘢，覺得好刺激！」她直言進入木箱時已感到相當緊張：「心入面只希望成功，因為呢個唔係錄影！」由於法蘭茲曾為多位巨星的演唱會加入魔術元素，包括Michael Jackson、日本天后濱崎步、譚詠麟等，問Fiona日後開騷會否邀對方演出？她坦言：「有同佢傾過呢樣嘢，係成事嘅話就遲啲公布，（好大機會合作？）我覺得有機會囉！」而法蘭茲亦對Fiona讚不絕口：「合作前大家都跟我說Fiona係大明星，我以為佢會有明星氣派，點知佢毫無架子，仲做得非常好！」看來二人再合作的機會相當高。
魔術令人有希望
提到今次公演的女主角是經過精挑細選才落實，考慮因素包括知名度及是否擁有女神形象等條件，Fiona聞言後即謙虛表示：「我唔係女神，唔可以咁稱呼自己，不過我知道要做呢個表演，真係好開心！」對於魔術，Fiona亦有一番獨特見解，認為魔術跟電影一樣，能令人保持童真：「人大咗出嚟工作，會知道好多陰暗面，魔術可以畀到希望大家。」法蘭茲亦表示看魔術會有一種自然的驚喜感覺，這才是真正的魔術。
瞞父母演出
Fiona與法蘭茲合演的「逃脫術」有一定的危險性，加上前日澳門下着滂沱大雨，令這場室外公演更顯得動魄驚心！Fiona為了不讓雙親擔心，一直未有向父母透露表演內容：「因為今次係同大師一齊表演，要有好大要求同緊張，媽咪都唔知呢件事，爹哋都係尋日先知，佢話想嚟睇，我就話唔好啦，太遲啦，之後9、10日會有個長啲嘅騷，仲叫我幫佢撲飛。」