張美妮有倚靠 誓要做好老婆
張美妮十一月便會做新娘，快將成為「人妻」的她，坦言性格改變不少，雖然多了一份「倚靠」，但她對此行還有野心，演戲的興趣比以前更濃厚，希望不會太遲。
張美妮近年多了不少拍劇的機會，以前多做主持的她，現時反而對演戲更有興趣，於現時播映的《師父．明白了》中，美妮的角色因被老公拋棄而性情大變，對她來說，甚考演技，而於新開拍的《愛我請留言》中，年紀輕輕的美妮居然飾演校長一角，說到外形似乎長不大般，美妮謂：「一來好開心，二來我都怕自己嘅外形駕馭唔到啲成熟角色，不過呢個校長角色其實內裏都係有少女情懷，都幾好玩，不過監製之前一講要做校長，我就諗起譚玉瑛，認識嘅佢平時好似好嚴肅，但私底下佢都好好玩、又會鍾意飲吓紅酒咁，我覺得自己可以參考吓，擺落角色度。」
滴酒不沾
美妮十一月便與未婚夫結婚，快要嫁的她，坦言都有不少轉變，現時的她，學懂為未婚夫慳錢，更沒有以前那般任性，現時滴酒不沾。美妮不諱言有陣子經常飲酒，更飲至「斷片」。她笑謂：「我哋都想快啲生小朋友，做老婆嘅責任係老公喺出面工作，做老婆就孭起頭家，佢畀家用我，『落格』之餘，我都要好好咁運用，好多成功男人背後，都係因為有個好老婆咋。」
之前有陣子感情未穩定、事業停滯不前，美妮曾經常飲酒麻醉自己，她謂：「嗰陣好鍾意自己喺屋企聽歌、飲酒自我麻醉，試過飲咗三杯XO，落咗街、買完嘢返屋企斷咗片都唔知，自己出過街都唔記得，知道後我自己不停喊，男朋友冇鬧我，只係問我點解會咁，嗰次之後，我就叫自己戒酒。」
美妮又坦言現時有了「倚靠」，個心都定了不少，壓力亦減少，但她坦言於此行還有野心，她謂：「我未至於有野心做主角，要大紅大紫，亦可能依家已經太遲，不過我對演戲嘅興趣係有嘅，依家睇戲，會多咗研究，我份人好感性、情緒化，而依家會識將呢啲擺落做戲上，之前演戲上有問題，我都有打電話問阿爸（曾志偉），佢都好有耐性教我，其他好朋友楊怡、趙永洪佢哋都有提點我呢！」
文：影視組
攝：吳文聰
髮型：Jerry@Sigo Hair Salon