陸浩明過無綫迎接新挑戰

由有線過檔無綫的陸浩明（６號）工作不斷，現時他忙於個人訪談節目《６號訪》，發展不俗。回想未過檔前，其實６號內心充滿掙扎。他說：「諗番喺舊公司做到第七、八年，因為工作同收入都好穩定，令生活太安定。喺舊公司臨完合約之前，我內心都好掙扎。咁啱當時我恩師余詠珊轉咗嚟無綫做高層，佢仲同我講：『６號，你係時候要轉變吓，你喺舊公司已經確立咗形象，係一個性格鮮明嘅主播，但局限喺舊平台嘅收視、覆蓋度問題，好難有進步。』諗深一層，對一位三十歲出頭嘅人嚟講，都想有新嘅發展，所以就過咗嚟無綫。」