Monna胸狠膽大 唔怕鹹濕鬼
有「混血E神」之稱的林宜芝（Monna），最近膽粗粗轉型做靈異節目主持，雖然她暫時未遇過靈異事件，但身材惹火的她就自言曾在沙灘遇過「鹹濕鬼」，並信心爆棚表示有身材就不怕晒料，認真豪邁！
Monna雖然看似嬌滴滴，其實非常大膽。近日她轉戰「靈界」。早前她擔任靈異節目主持，更特別請師傅開「天眼」為求撞鬼，認真大膽。從小喜歡研究靈異事件的Monna，自言單獨看鬼片都冇有怕。她謂：「我試過出trip自己喺酒店房睇鬼片，又會自己一個喺屋企睇鬼片都唔驚。」
雖然未見過真正鬼怪，但夏日炎炎，Monna每次到沙灘暢泳時，其噴血身材必定會引來不少「鹹濕鬼」。她說：「鹹豬手未遇過，不過就有唔少人會用奇怪目光望住我，又鍾意喺我附近行嚟行去，不停望我。」
特登買細碼泳衣
自言有儲泳衣癮的Monna，其收藏已逼爆家中衣櫃。雖然她曾經嘗試轉贈老友，但就食檸檬收場。她笑言：「啲朋友第一句就話『嘩你啲泳衣咁大我唔啱o架喎』，其實我有啲特登買細咗。」提到感情生活，Monna一臉冧樣地指男友不會介意她穿三點式到沙灘：「我覺得有身材先可以着o架嘛！有好多人恨都恨唔到，塞幾廿個pad入去。有身材趁後生要騷吓，唔係到七老八十搵鬼睇你咩！」
性格爽朗的Monna透露今個夏天最想相約女性知己，齊齊到陽光與海灘的地方「（目及）嘢」，她說：「唔一定（目及）靚仔嘅，（目及）珊瑚都得。我有成班女仔朋友一齊去已經好開心。」
文：專案組
攝：林楠
服裝：Maxxii mode