鍾一憲天降石屎險命喪

鍾一憲前晚在instagram上載一幅招牌框和石屎散落一地的相片，指自己死裏逃生：「今天，本來可能已經死了或重傷……不到10秒鐘眼前的招牌和石牆各種的剝落掉下來，嚇死我們……死而復生的我們就抱在一起了！」

嗌交避一劫

昨日鍾一憲接受電話訪問，憶述意外仍有餘悸：「嗰晚9點我同朋友約咗唱歌老師食飯，食飯前想去捐錢，諗起快餐店入面有捐錢箱，正想入去嗰陣，朋友突然拉住我嘈交，過咗5秒突然前面有個招牌架連埋石屎跌落嚟，嚇到我哋當場呆咗，嗰度有鋼釘，又有鐵牌，又有石屎，如果砸中我哋，我諗唔死都重傷！」

大難不死的鍾一憲當場和朋友擁抱慶祝，性向成疑的他自爆對方是前女友：「其實佢係我前女朋友，我哋讀書識，不過我哋分咗手之後感情依然好好，出事後有請佢食飯多謝佢。（有機會翻撻？）其實我一路有鍾意嘅人，但唔鍾意交代感情嘢。」

捐錢做好事

經歷過生死劫的鍾一憲笑言當時回過神後，繼續做他未完成的任務：「我哋之後有入快餐店捐錢，自己周不時都有捐錢，（善有善報？）又唔敢咁講，反正捐錢係做好事，又唔係傷害人。」剛約滿大名娛樂的他更乘機暗寸舊公司，直指自己甩難：「琴晚（前晚）係我喺大名合約最後一日，今次大難不死，一定係好事到，簡直係重生一樣。」

文：音樂組