薛凱琪唔吼大同 願貼錢溝仔
31歲薛凱琪（Fiona）自稱單身多時，但桃花運旺盛兼男女通殺，先後與歌手林二汶傳「斷背」及與「舊愛」房祖名睇騷後，前晚又被拍得夜會另一緋聞男友方大同，兩人更疑似拖手，但卻遭Fiona表明不願與對方拍拖，更直言有錢的她擇偶不需靚仔同有錢，最重要專一！
Fiona年前傳跟「舊愛」房祖名分手後，身邊不乏「觀音兵」，最近她和歌手林二汶被傳在音樂會上跳辣身舞而成密友，其後更發展「斷背」情；而日前Fiona又跟「舊愛」房祖名齊睇陳奕迅演唱會，兩人不避忌熱情合照再被懷疑「舊情復熾」。
知偷拍冇彈開
不過昨日有讀者爆料，指前晚在尖沙咀遇見Fiona和方大同「拍拖」，並提供三張相作證，相中長髮披肩，便裝打扮的Fiona和笠cap帽的方大同站在街頭，雖方大同左手挽住外賣膠袋，但雙手放在前的Fiona，因身體靠近「男友」，Fiona的右手看似正拖住方大同的左手，兩人同時發現鏡頭，可是難捨難離的「緋聞男女」，並沒有因被偷拍而嚇到彈開。
見面少情不變
昨日Fiona在電話中被問到拍拖時，她嬌嗲謂：「冇拖手呀，我哋係一齊食飯，不過唔係拍拖，我唔想同佢（方大同）拍拖喎。（咁想唔想拍拖？）想，最想搵個專一嘅男仔，唔使太靚仔同有錢，因為我有錢。」她續稱自和方大同屬不同唱片公司後，見面機會減少，但感情不變，一有時間就會約見面。問她可有代經理人黃柏高拉攏方大同合作？她謂：「唔會啦，因為佢唔受人控制，我唔會代佢講工作上嘅事，怕佢見記者時冇嘢講。」
文：音樂組