千語未plan做峯嫂
【何愫盈澳門直擊】拍拖不足一年的吳千語和林峯屢傳婚訊，日前有指千語借麥玲玲師傅過橋，逼男友交出時辰八字擇日結婚，千語昨日出席活動時強調自己毫不迷信，更不急於搶佔「峯嫂」位置，短期內絕不結婚。
吳千語、連詩雅（Shiga）和周柏豪昨日到澳門威尼斯人購物中心出席「澳門金光名區《愛在仲夏》活動」，吸引大批fans逼爆會場，柏豪更在「騎樓」大唱冧歌，令兩女高呼好浪漫！三人又在台上與fans玩遊戲，柏豪更獲兩女餵食雪糕，表現勁冧。
唔撐男友歌喉
有傳千語BB在機艙上巧遇堪輿學家麥玲玲師傅，聲稱她逼男友林峯交上時辰八字，好讓玲玲師傅幫她擇吉日做「峯嫂」。對此傳言，千語昨強烈否認：「睇到報道都莫名其妙，我係撞到玲玲師傅，不過只係傾吓閒偈。」她又強調絕不迷信：「我唔信呢啲八字嘢，連自己八字都唔知，冇算過命理。（師傅冇贈你兩句咩？）私下傾偈唔講呢啲嘢。」
對於玲玲師傅指二人明年「唔結就分」，千語顯得信心十足：「呢啲嘢唔需要信晒，我哋短期內都冇計劃結婚，忙做嘢先。」另外，她又大讚柏豪新歌好聽，問到林峯歌喉如何？她竟不撐男友：「我鍾意聽柏豪唱歌多啲！（邊個好聽啲？）都好聽！」
Shiga自認平胸
柏豪則表示正為明年紅館個唱操fit：「準備下年暑假開，依家要開始操o架喇，個台大咗，啲肌肉都要大舊啲！」Shiga亦搭嘴謂想練腹肌：「最好練到四舊啦！（會唔會練到冇埋上面嗰兩舊？）咁就不嬲都冇嘅！」