周秀娜醫腳愛的Cap帽止痛
曼聯與傑志進行表演賽，周秀娜因「趾公」受挫未能親身捧緋聞男友里奧費迪南場。費迪南昨晚在大球場的同時，娜姐被迫到診所做覆診，只見她在病床上接受治療時痛到叫苦連天，惟有一直戴上費迪南所贈的Cap帽當止痛藥心靈對沖。
儘管娜姐日前已跟曼聯鐵衞里奧費迪南在酒店世紀見面，她仍一心諗住親身捧費迪南場，可是昨晚撞正要到診所覆診，加上今日就要到內地開工一個月，絕對不能改期，惟有忍痛打消赴大球場睇波的念頭。昨晚七時，娜姐「跛住」現身銅鑼灣，只見她行路都趷下趷下，似乎痛到面無血色。
娜姐一直戴上費迪南所贈的Cap帽，即使躺在病床接受治療也不願除下，就算痛到咿嘩鬼叫，平日捱不到痛的她依然咬實牙關，莫非頭戴費迪南Cap帽當止痛藥？離開診所時，娜姐對於未能一睹費迪南球技大呼可惜：「勁可惜！不過唔緊要，下一次囉，都見到面喇，同佢見面感覺好得意，好似一見如故咁，真係好開心，今晚（昨晚）未能親身支持唔緊要，咪等下次囉，佢都請我下個月9日去睇佢紀念賽！」娜姐表示拍網劇一個月，所以希望下月能向劇組請假到英國睇波。
準備大size鞋
據知，劇組已為娜姐的右腳買重保險，令她可以安心開工：「希望唔會影響拍攝進度，我知要着高踭鞋，同有動作場口，我都驚整親，所以叫劇組預備大Size嘅鞋畀我！」她又表示腳趾公出現少許骨折，問題不大，只是仍有點痛。
而與娜姐見面後，費迪南更見風騷，他昨早操練完畢後返回酒店，即主動跟fans簽名，發現其簽名跟中文「旦」字十分相似，問到跟娜姐見面送Cap帽之餘，又承諾請娜姐到英國睇波，費迪南即陰陰嘴笑，並沒有回答記者問題便入酒店休息。
文：專案組