張智霖肉搏法拉 誓要老婆嘩嘩聲

張智霖在《衝上雲霄Ⅱ》飾演顧夏陽一角，性格風流、不可一世，自以為高人一等，缺點處處，不但沒有令他形象受損，反而人氣急升。他坦言不擔心過往建立的善良形象被毀：「顧夏陽同過往演過嘅好唔同，我好想挑戰自己嘅能力同挑戰觀眾嘅底線。」

擔心演得唔夠衰

相反，吳鎮宇於第一輯中形象討好，已被觀眾先入為主，張智霖不擔心被外界作比較。他說：「一開始設定我嘅角色，係要同吳鎮宇個角色有好大反差。佢好專一、好謹慎、好循規蹈矩，我要全部相反先有戲劇衝突，我只想盡量配合團隊同劇組更完善發揮成件事。」多演善良角色的他曾反問自己是否真的稱職：「我怕我演得唔夠衰，拍風流情節又好多嘢諗，今次係以另一角度演好自己角色。（擔心形象受損？）我只係不停打破自己，又唔係演反派，只係好強勢嘅一個人，喺劇入面起到一個衝突作用。」

節目收視高開，張智霖未敢居功，認為是台前幕後一齊努力的成果。	與法拉拍激情戲時，張智霖坦言心跳加速。	袁詠儀都是演員，相信不會介意老公拍情慾戲。

除了陳法拉和陳敏之，張智霖還與多位女演員奉旨親熱。問他與陳法拉拍親熱戲有何感覺？他謂：「同佢嗰場好激，監製話唔可以透露邊一場戲同邊日播出，作為一個秘密武器，大家要集集追。（尷尬？）我當時心跳得好厲害，因為好刺激！」

最緊要大家開心

問到太太袁詠儀會否不高興？他笑說：「大家都開心嘅，觀眾都睇得開心，太太都會睇得開心。（唔會嬲？）有乜所謂，演戲又唔係真。（事前問過？）梗係冇，保持神秘感，等佢電視睇到時嘩嘩聲就正嘞！佢實嘖嘖稱奇。如果吓吓都要事先講就乜都唔使做，大家都係演員明白演戲係咩一回事。佢之前同秋生拍葉問，我打畀佢問拍緊咩，佢話同秋生拍緊床上戲，我仲叫佢拍得開心啲。」

文：影視組

化妝：Shuen Kong @ Will Wong make up

髮型：Vic Kwan @ ii hair & nail

服裝：MMM @ I.T

場地：富豪機場酒店