鄭俊弘識做送禮 報答巫啟賢

資深歌手巫啟賢昨日為今、明兩天於會展舉行的《那些年我們一起唱情歌演唱會》進行綵排，將會和他組成「父女檔」表演的女兒歡歡，亦有到場和爸爸率先上演自彈自唱。因在無綫《星夢傳奇》中被巫啟賢「發掘」而人氣急升的Fred亦有到場，送上和巫老師的合照，隨即被巫啟賢盛讚是樂壇滄海遺珠，更拍心口稱若Fred開騷他一定會去做嘉賓。

父女檔獻唱

提到和囡囡同台表演，巫啟賢笑言女兒好緊張：「佢冇經驗，雖然由細到大睇我演唱會，我綵排佢都有上台玩，當佢知道要坐喺度彈琴唱歌就有壓力。」而巫啟賢對於另一嘉賓Fred可謂「聲聲」相識，問到請一位唱歌「新人」做表演嘉賓可是賭博？巫啟賢說：「Fred揸住支咪，唱歌就會變另一個人，我睇過好多藝人，見過好多新人，聽佢唱十秒就知道實力，Fred係香港十大唱得好嘅男歌手之一。」而在旁的Fred則謙虛地說：「我好張緊，多謝巫老師畀機會我。」Fred又指未問緋聞女友姜麗文會否來看表演，如果她有時間來看都不錯。

夏韶聲誤會

另外，巫啟賢又表示8月10日將會再做《星》評判，直言不會改變風格，問到會否擔心「狠辣」的評語令藝員傷心？他說：「唔好睇小藝人，佢哋身經百戰，有唔同嘅經歷，如果佢哋夠聰明，會聽到我說話入邊嘅用意。」提到夏韶聲指他的評判風格是博出位，巫啟賢指當中可能有誤會：「我冇睇嗰篇報道，相信係誤會，夏韶聲一直係我欣賞嘅歌手，如果佢認真睇過嗰幾集會認同我。」

文：音樂組