朱璇客串福利攬cool魔
無綫藝人朱璇、滕麗名（阿滕）及黎諾懿等昨日出席劇集「《愛‧回家》火辣辣沙灘派對」活動，可惜眾女均穿上背心短褲包到冚，唯獨身穿deep V長裙笠針織衫的阿滕，隱約露出3吋事業線最有睇頭。
有幸客串重頭劇《衝上雲霄II》的朱璇，笑言希望《愛‧回家》能邀「cool魔」張智霖（Chilam）客串，她笑道：「係《衝上雲霄II》監製同我講嘅福利，叫我客串兩集同Chilam對戲，可以攬吓、抱吓佢，如果唔係有咁好福利，我可能都未必客串。（唔夠喉？）多啲或再親密啲就更好。」她又讚陳法拉戲中好得意，問有否關心對方的情變傳聞？朱璇直言有傳短訊慰問對方：「佢話冇乜嘢，我覺得佢係好堅強嘅女仔，相信佢冇嘢，作為朋友都唔會追問，畀啲空間佢。」
滕麗名冇時間擺酒
至於新加入《愛‧回家》的阿滕稱10月、12月將開新劇，問是否年尾結婚擺酒？她說：「吓！真係唔知喎，要開工好忙，依家年尾進行唔到，睇下年年頭點啦。（冇預幾時？）唔敢預，我一plan就有事，又開工又忙。」
文：影視組