子丹50歲生日 老婆當大禮
「宇宙最強」甄子丹及楊采妮等日前為英皇電影開工，劇組特地送上壽桃及全球僅得一個的子丹Q版公仔，預祝子丹月底50歲生日，笑晒口的子丹表示將與老婆食飯慶祝，但不需要禮物：「佢已經將成個人送咗畀我！」sweet到爆！
甄子丹、楊采妮、白冰、方中信及內地男星王寶強等日前在上水河上鄉為英皇電影《一個人的武林》開工，老闆楊受成專程前來探班，期間劇組送上一籃大壽桃，為月底生日的子丹預祝，氹得壽星公非常開心！王寶強亦送上子丹Q版公仔，子丹笑說：「好開心，全世界得一個！」
每年例請三日假
問到生日正日將如何慶祝？子丹表示不介意開工，但相信會跟老婆汪詩詩撐枱腳。提起老婆，他即一臉冧樣：「唔使送禮物啦！佢已經將成個人送咗畀我！依家生活好幸福美滿，一家人食吓飯就開心，全年有三日我一定唔開工，就係老婆生日、情人節同母親節！」子丹絕對是「溫柔大男人」！
提到新片向動作電影致敬，身為動作指導的子丹表示不覺太緊張，一開工即靈感湧現，至於會否遷就玉女采妮？他說：「佢不知幾犀利，合作過《七劍》，但點都唔會設計得太難，呢樣係男性風度，而且佢揸槍多嘅。」
與女神合拍MV
楊采妮透露當日與子丹拍攝道別戲，但兩人沒有感情線，反而跟方中信有曖昧，期間方中信碰巧路過，兩人合照時男方竟表現尷尬神不守舍，他笑說：「我自細就當佢係我女神！大家合作過一首歌MV，今日同女神合照好開心！」
白冰則表示跟演大賊的王寶強有大量打戲，但踢爆對方喜劇感十足：「見到佢都唔知打好定笑好！」此外，早前有傳《一》片被偷去槍械道具，據了解原來是司機擺烏龍誤報警，實屬虛驚一場。
文：影視組