阿嬌國語碟勁賣感動爆喊
首次推出國語碟的鍾欣桐（阿嬌）獲得雙白金的佳績，昨日在祝捷會上更獲經理人霍汶希大讚，令她感動而泣，阿嬌更不諱言話同前緋聞男友吳克羣合唱國語歌後，信心大增。
歌手鍾欣桐（阿嬌）昨日在酒店舉行新碟祝捷會，首次推出國語碟就勇奪雙白金成績的阿嬌，獲大會送贈雙白金唱片，英皇高層吳雨大爆金句助慶：「會場叫『天澄閣』揀得好，阿嬌雨過天青，佢失去咗好多嘢，依家攞番仲多。」經理人霍汶希（Mani）又大讚，話好耐都無聽過有人讚阿嬌唱得好，受感動的阿嬌多次落淚，喊到擰轉身抹眼淚。
打算放棄
阿嬌話新碟做得好滿意，自己亦都好鍾意國語歌，今次畀自己95分，但阿嬌同時自爆曾打算放棄唱歌，她說：「近年喺內地工作好忙，冇時間練歌，有段時間唔想再唱，叫Mani畀我拍戲算，好彩公司仲畀機會我。」阿嬌又話自己為人好冇自信，容易受批評影響表現，自從同前緋聞男友吳克羣合唱完國語歌後，為自己打了支強心針。
再度發育
另外，阿嬌早前在台灣練習「鯉躍龍門」時，因頭部先落地而整傷舊患，仲搞到舉唔起隻手，要到北京睇物理治療，但卻意外地「再度發育」，她更笑言：「個療程好貴o架，但我做完後好多人話我高咗又直咗。」
文：音樂組