蔡加敏老公未夠皮有排生
玩具大王蔡志明太太蔡李惠莉的幼兒園前日舉行畢業禮，全家總動員撐場，月前剛榮升第三任媽咪的長女蔡加敏產後首次公開亮相，短短一個月已火速修身，而妹妹加怡見家姐生完一個又一個可愛baby，亦受到感染，表示隨時ready生B。
蔡李惠莉創辦的安基司幼稚園暨國際幼兒園前日舉行第十三屆畢業典禮，身為校監的蔡太當然親自到場主禮，而蔡生、女兒蔡加敏（Carmen）與丈夫馬鴻銘（John）、蔡加怡（Crystal）和丈夫陳漢驄、孻仔蔡加讚和未婚妻汪圓圓等均有到場支持，Carmen五歲的囡囡馬靄翹（Chelsi）更扮演美人魚在台上表演跳舞，Chelsi見記者拍照即展現燦爛笑容兼大擺甫士，還脫去外套仔騷美人魚造型，cute到暈。
Carmen產後短短一個月已極速修身，幾近回復產前的身形，她說：「有經驗，今次冇之前肥咁多，自己都食少啲。」她透露BB現在重8磅多，英文名Kaden。問到會否再生？她即耍手擰頭，但她身旁的John卻說：「生，生得就生，啲小朋友好乖，唔難湊，都唔辛苦。」Carmen即反駁他說：「你梗係唔辛苦，都唔使你生，我生之嘛，你負責同佢哋玩。」場面搞笑。
圓圓環保婚宴冇魚翅
而曾表示想享受下二人世界的Crystal被問到何時生B，她說：「順其自然，其實隨時ready。（畀家姐感染？）都會，見到佢啲小朋友咁得意，我仔女都鍾意，最少生兩個，熱鬧啲開心啲。」至於加讚和圓圓則笑言他們之間沒有肉麻稱呼，圓圓已訂了Vera Wang的婚紗，婚宴將不會有魚翅，圓圓說：「要支持環保，可能用花膠代替。」
另外，圓圓胞姐詩詩與老公甄子丹為慶祝今年結婚十周年，二人早前專程拍攝結婚照紀念，昨日詩詩把靚相放上微博分享，她說：「如果有時間，我哋想去威尼斯再影多一輯相，而結婚紀念日正日我哋會喺威尼斯參加影展，雖然係為工作，但總好過子丹飛去其他地方拍戲而唔可以一齊，當日應該無乜特別慶祝活動，呢輯相就算係慶祝。」
文：名人組