梁政珏照顧植物人
學生們又開始放暑假了，其實不少藝人未入行前，都曾經做過暑期工，原來「魔鬼胸」歌手蔚雨芯、前港姐許亦妮和藝人文詠珊未入行前，在暑假都做過兼職模特兒，跟現在的工作可謂息息相關，反而藝人梁政珏最特別，曾到醫院為植物人讀報，發放求生正能量。
蔚雨芯：「從來冇做過暑期工，14歲已經入行做兼職模特兒，基本上一邊讀書一邊兼職，都冇特別分係咪暑期工。」
許亦妮：「以前讀書做暑期工係做模特兒，喺會展做過，因為要企好長時間，而且太細個，媽咪話辛苦叫我唔好做，記得當時同JM（文詠珊）一齊做過嘢，依家仲好老友，成日柴娃娃玩。」
高海寧：「讀書時都會幫小學生補習，小一至小三嘅小朋友最難教，其實只係教佢哋坐定定就夠啦，哈哈！不過我好鍾意小朋友，所以嗰時做補習老師都幾開心！」
文詠珊：「我第一份暑期工就係兼職模特兒，最難忘係每一日由荃灣去到柴灣做嘢，因為啲studio全部喺柴灣，真係好遠。」
陳智燊：「第一份暑期工喺泳池做救生員，當時我考咗個牌，唔好以為救生員坐喺度乜都唔使做，其實要睇人之外，仲要睇埋個場，好彩我連續做咗幾年暑假，都冇發生任何事。」
王菀之：「暑期做過銀行IT部，但我唔識電腦，我靠人事關係入去做，係auntie介紹，不過，我只係喺度寫歌，《我真的受傷了》就係嗰時寫。佢哋都預咗個職位畀我，所以我做咩係唔重要。」
梁政珏：「讀書嗰陣喺醫院做過義工，喺腦外科照顧一個植物人，每日讀報紙畀佢聽、餵佢食嘢時要幫佢掃喉嚨，等佢吞落去，又同佢傾吓偈。見到佢好有求生意志，不過好可惜一個星期後佢就過咗身。」
Jessica C.：「我15歲嘅時候，喺媽咪做嘢嘅老人院做接待員，雖然只係聽電話同接待嘅工作，不過可以學到好多嘢，對我嚟講係終生受用。」