阮民安疑搬竇避債
近年涉及多宗金錢糾紛的阮民安（Tommy），近日又被指曾向一間財務公司借貸數萬元，有指Tommy以分期形式還了幾期款項後，就搬屋避債，而Tommy昨受訪時亦不否認曾為了生意而問人借錢。
「樂壇小強」阮民安（Tommy）曾涉及欠賭債、賣假飛及拖糧等錢銀瓜葛，有消息指，由於Tommy仍有欠債未清，最近被一財務公司追查下落。本報收到一份財務公司借據，借貸人為阮民安Tommy，報稱住址為勝利道某單位後座，於2010年11月24日向財務公司借貸港幣數萬元，借據列明他要分十期歸還，並有親筆簽名作實。
挽救蝕本生意
有指Tommy債務糾纏不清，有人於借貸後，只還了幾期款項，之後就避債，更長期熄電話及居無定所，債主到勝利道的登記住址，發現人去樓空。昨日致電Tommy時，起初他理直氣壯否認三年前借貸：「冇啦，成日話我欠債，簡直係荒謬嘅新聞。煩到爆，當我怕咗大家，唔好再搞搞震。」記者追問後，Tommy改口供說：「之前搞公司有賺有蝕，我唔否認有啲數仲搞緊，我為咗盤蝕本生意，用唔同方法問人借錢。」
據知情者透露，財務公司之所以沒入稟告Tommy，是怕一拍兩散：「佢唔止欠呢筆數，一旦申請破產，所有財產會交畀破產管理署，其他債權人都收唔番筆數。依家四出搵佢，係想佢自己負責。」