羅霖亂爆離婚 黎淑賢反面
【陳偉立澳門直擊】最近傳婚變的前亞姐黎淑賢，昨日帶同三名兒子到澳門出席活動，老公許智政則未見影蹤，她強顏歡笑稱沒打算離婚，但同場的好友羅霖竟亂爆大鑊，承認對方託她介紹離婚律師，令Bonnie相當愕然，人前兩人繼續扮friend，但據知Bonnie怪羅霖失言，姊妹已反面！現年36歲的前亞姐黎淑賢（Bonnie）於2007年下嫁美容醫生許智政（Angus），但Angus多次被拍到與公司女職員密會而傳出婚變。昨日Bonnie帶同三名兒子到澳門出席動畫電影《極速TURBO》首映。
第三者介入？說法不一
提到婚變傳聞，Bonnie作出澄清，表示近月有很多不實報道及惡意中傷，與Angus商量後決定交由律師處理，她仍稱呼Angus為老公，問到是否依然恩愛？她說：「我哋好開心！（佢唔一齊嚟？）佢要返工，唔係邊個搵錢畀我？（Angus有幾多時間畀屋企？）佢係好醫生，呢次係我最後一次公開活動，之後專注湊小朋友。」問到是否有小三介入、是否找羅霖介紹離婚律師等問題，她一概回答：「與事實不符。」她又言日前在家中過生日，開心切蛋糕，但拒透露老公送了甚麼禮物，對於Angus與女職員過從甚密，她表示不理會丈夫公司的事，全程她保持笑容。
不過，其後同場的羅霖卻爆出另一版本！她表示與Bonnie一直有聯絡，並一副「專家口脗」說：「無論咩原因，離婚都有一段辛苦過程，我係過來人，會互相扶持。（佢向你訴苦？）互相傾訴吓啦！（你介紹離婚律師畀Bonnie？）係呀！佢唔知搵邊個，我早過佢（離婚），個律師OK。（佢老公有小三？）大家有睇報道，呢個係其中一個原因。」此時，Bonnie再度現身，兩人擁抱合照狀甚友好，但當Bonnie得悉羅霖爆她打算離婚，即語帶激動：「唔明點解佢咁講！佢又唔係當事人！（搵佢介紹律師？）冇可能！（原諒老公？）佢都冇做錯，何來原諒？」遂表示要跟羅霖「溝通吓」。
夾完口供 眼紅紅受訪
約15分鐘後，二人夾好口供，再主動作出澄清，表示有誤會，羅霖說：「佢搵律師其實係想改名。」Bonnie說：「半年前已想改名，做咗改名契，但未入紙。（點解版本有分歧？）好耐冇聯絡，可能佢睇新聞誤會咗。」期間Bonnie講到眼紅紅，勁尷尬的羅霖打圓場表示夫妻和睦就好。
據知，羅霖早前離婚時，獲Bonnie一直默默支持，如今羅霖卻多口失言，令Bonnie不滿，姊妹經已反面。事後Bonnie接受電話訪問時說：「佢介紹律師，咩用途都唔知就自己猜度，應該問過我先！佢有同我解釋話啱啱落機，都係睇新聞。」羅霖則澄清並非踢爆，亦不擔心會影響友情：「一直有聯絡。（佢話冇乜！）唔係日日通電，但有事會通知對方。」