陳智燊出浴甩皮脫貧

藝人陳智燊（Jason）早前透露在入行初期，曾窮得銀行戶口只剩下50蚊，要靠家人接濟，近年拍劇成功入屋的他，憑健康形象密密做，3個月內連拍3廣告，穩袋7位數字酬勞，正式與貧窮生活說再見！

Jason獲得大棧青睞，以6位數酬勞擔任燕窩健康飲品代言人。拍攝廣告當日，Jason換上多個造型，不斷Chok甫。雖然廣告拍足兩日，但Jason仍面不改容，電眼十足，迷得現場工作人員一陣陣。其後Jason更犧牲色相，赤裸上身浸浴，大騷健碩身形，不過原來「有苦自己知」，他說：「我浸咗喺水成三、四個鐘，雖然鏡頭面前我好享受，但係其實啲水好凍，搞到我下半身甩晒皮。」

化身師奶殺手

另外，Jason亦化身「師奶殺手」，將產品分給親友，連化妝間的阿姐都唔放過，他說：「有好嘢梗係同人分享，我一見化妝間阿姐就會派埋畀佢哋飲。連平時喺油站幫我入油嘅姐姐，我都派埋畀佢哋，佢哋一收到即勁開心！」

文：專案組