薛凱琪自我安慰：鍾意先會抄

薛凱琪（Fiona）去年親自為歌曲《倒刺》執導拍MV，穿上好友設計師Kevyiu操刀的綠色低胸透視露背紗裙。近日發現有結婚禮服設計師公然在Facebook刊登一位女模特兒穿上激似Fiona當日的紗裙照片賣廣告，並聲稱紗裙是經過連夜通宵設計。Fiona大表無奈，惟有安慰自己：「佢應該都鍾意我先會咁做。」

「要尊重知識產權」

Fiona最初也誤以為相中人是自己：「後來先知係A貨，個女仔髮型同我一樣，連個沙灘景都抄！有開心有唔開心，MV對我意義重大，係我第一次親自執導，惟有安慰自己佢應該仰慕我吔先咁做。人哋鍾意先會去抄，唔會憎你又抄你嘢。」她認為要尊重知識產權：「做設計師唔易，Kevyiu好努力去創作，咁辛苦建立自家品牌，我支持本地設計師，我有電話安慰佢，我話名牌先有A貨，做得差都唔會有人copy。」

令香港設計冇進步

Kevyiu坦言感覺好笑：「連個景都抄埋，Fiona條裙係我一年多前造嘅。（好無恥？）都可以咁講，就係有呢啲人存在，先令外國人睇唔起中國嘅設計師，亦因為有呢班人，令香港設計唔會有進步。」

另外，Fiona日前到台灣拍攝新歌《諸葛亮》MV，穿上鑲滿水晶透視貼身長裙的她舉步維艱，要出動三名工作人員幫手才能郁動。

文：音樂組