Naomi主動追擊春卷匿埋
李思捷「正印」王宝宝（春卷）前晚現身夜店活動時，與過氣「小三」馮鎵瀠（Naomi）同場撞個正，場面尷尬，豈料Naomi乘勢追擊春卷，要求合照，嚇得春卷影大合照時「失蹤」。除了兩位「捷女郎」成焦點，同場的多位性感女星及o靚模包括黃榕、梁晶晶、「寸嘴Barbie」夏尉喻、冬甩等「胸」群而出亦不容忽視！
李思捷經常惹緋聞，早前便傳與o靚模Naomi撻着，其「正印」女友春卷前晚出席活動時，竟與Naomi同場，情況尷尬！春卷見狀刻意迴避Naomi，影大合照時也匿在一旁，不過Naomi竟反客為主要求合照，令春卷大感愕然。春卷受訪說：「冇尷尬，我都唔識佢，都唔知佢會嚟。（影大合照匿埋？）啲人叫我企埋一邊嘅。（男友經常惹緋聞？）唔想再講男友。（分手？）唔講喇，係very good friend。」雖然春卷被殺個措手不及，但思捷昨日即在微博上載一張春卷做封面的雜誌相片，明顯要呵番女友。
Naomi直言與思捷有兩個月無見面，問到她嚇親春卷，Naomi說：「打個招呼冇咩唔啱，一路都想同佢做朋友。（春卷唔夠大方？）佢之前話唔知我係邊個，我咪同佢say hi囉。」
梁晶晶反寸柯震東
同場的性感女星及o靚模「峰」芒盡露，34D「黑色暴乳」夏尉喻搶盡「峰」頭，不過黃榕就死撐男仔最喜歡的就是其C cup導彈。而連日來借台星柯震東博出位的梁晶晶，遭柯震東在微博嘲諷她造新聞相當可憐，梁晶晶竟說：「佢仲好意思講，識到佢就真係好可憐，近兩日喺微博畀好多不明來歷嘅人鬧。」梁晶晶又暗示柯震東有要求她收聲，惟她反指柯震東也在博宣傳。
文：影視組