劉嘉玲查理斯握手：佢好有力量
英國王儲查理斯舉辦皇室派對，劉嘉玲有幸獲邀成為嘉賓，並與查理斯傾偈和握手，相當有面！嘉玲大讚查理斯親民兼有王者風範，握手時更感覺到對方很有力量。
英國王儲查理斯與太太卡米拉在當地時間7月9日，假其位於倫敦的大宅舉行皇室派對招待慈善組織Elephant Family，劉嘉玲獲邀任嘉賓之一，名流鄧永鏘（David）亦有帶同兒子鄧裕鏗出席。其餘嘉賓亦分量十足，包括英國搖滾樂隊Rolling Stones主音前妻Jerry Hall。原本在歐洲拍戲的嘉玲專程抽空飛抵倫敦出席派對，當日還穿上Elie Saab珠片長裙現身，高貴迷人。
咬火腿扮伸脷
嘉玲坦言很榮幸獲邀出席派對，大讚查理斯和卡米拉友善。初次見查理斯的嘉玲表示：「佢好親民，唔係想像中咁嚴肅。（有冇同佢傾偈？）佢有同我say hello，同每個賓客都打招呼，佢知我係邊個。最記得佢同我握手時，我感覺到佢隻手好有力量。佢好有紳士風度，又有貴氣同王者風範。（你係亞洲美女，佢見到你有冇驚為天人？）哈哈！唔會啦，唔知。今次係我第一次見佢，能夠參加呢個皇室派對，係一件好榮幸嘅事。」問見皇室成員可要特別禮儀？嘉玲表示有彎身：「可能喺花園搞，比較causal。」
相中見David與嘉玲玩得相當開心，David更咬着火腿伸脷，嘉玲對此笑說：「佢好幽默！（你有冇扮？）冇呀，我點搞怪？」當日嘉玲跟Jerry亦有搞笑互動：「我、Jerry同兩個朋友一齊為大會拍短片，仲跳舞，但我冇勁舞，都唔知啱唔啱節拍，因為係即場教。」
嘉賓獲贈面具
嘉玲又透露每位嘉賓獲邀前，有關方面已預先檢查各人的個人資料：「去到門口要check邀請卡嘅身份證，好有規矩，但入面好好玩。嗰度好特別，一共請咗24個藝術家整24件動物藝術品，然後擺喺唔同房，可以拍賣。每個嘉賓又獲派一個Mask（面具），我嗰個係似雀仔又似鷹，同件衫唔係咁襯，哈哈。」
文：名人組