江欣燕工作療情傷 唔稀罕贍養費
本報獨家披露江欣燕（欣欣）與結婚十二年的吳積遜（Jackson）正在辦理離婚手續，欣欣昨日收拾心情，首次現身返回電視城排舞療情傷，受訪時欣欣強調非因Jackson多女埋身而分開，但避談對方是否財困，承認已搬返娘家居住的她，揚言不要對方贍養費都可生活。雖然欣欣冷淡回應二人會否見面，但直言現未ready迎接新戀情。
江欣燕與吳積遜結婚十二年夫妻緣盡，發表單身宣言的欣欣昨日下午約五時單拖返電視城為新劇《Aerobic Girls》排舞療情傷，戴上黑超的她穿上運動裝素顏現身，更向在現場守候的記者報以笑容，心情似未有受離婚影響。
搬回娘家盡享親情
欣欣受訪時表示正處理離婚程序，問到何時決定離婚，她不願多談︰「呢啲嘢唔答，決定就要接受，做人就係咁，呢個係重大決定，大家有共識，其他原因唔需要公開。」她不在意離婚後的贍養費安排，欣欣說︰「有又點冇又點？呢啲唔重要，大家有經濟能力。」對於是否因傳聞Jackson有第三者而分開？她維護對方說︰「總之唔係第三者，性格方面，某啲好夾但某啲人生觀唔同。」是否經濟出問題？她說：「其他嘢唔想交代。」
有指欣欣因婚姻問題至逢派對必醉，她解釋說︰「唔係有心，我喺清醒時做人生決定，當時冇同屋企人講，只係兩個人傾。」及後她承認已搬返娘家居住︰「呢個好正常，依家展望新生活，其實以前都係同屋企人一齊住，最緊要佢哋明白。」心情似已平復的欣欣，指離婚一事正面面對，提到會否接受新戀情？她笑說︰「冇諗咁多，依家投入工作，和享受同父母嘅時間。」
問欣欣離婚會不會感到可惜？她一頓，聲震震說「唔係咁諗」，然後強顏歡笑說︰「哈哈，佢係一個好人，希望未來日子佢會好好生活，天下問題冇咩係過渡唔到。」雖然她在言語間處處維護「老公」，又直言二人關係OK，但二人會否再見面？她即冷淡的說︰「有事咪見，喺party撞到都冇法，冇諗會唔會尷尬。」更不關心Jackson的心情，僅拋出句：「各自處理」，並以趕排舞為由急急離開。
Jackson盼再續前緣
其後欣欣再接受電話訪問，她說昨早收到眾多好友來電慰問：「我唔使去散心，自己處理到，請大家放心，我冇問題，知道好多人錫我，我會專注工作，有工作做會開心。」另外，昨晚欣欣於《東張西望》中表示現時心情會有痛苦，提到是否因為Jackson花弗而分開，她說︰「點解冇人話我花弗？我同佢係深刻朋友關係。」
至於Jackson昨日在電話中表現輕鬆，直言心情OK，但對於與欣欣分開感可惜：「希望日後可以復合，世界冇嘢唔會終結，我同佢係有緣，希望可以再一齊，但已經盡咗力，雖然分開但大家仲好錫對方。」他更否認多女埋身出事︰「夫妻分開好多原因，性格問題，之前開夜場時有女仔埋身見到慣，但自己唔會埋去。」是否財困他則不作回應。
文︰專案組 採︰影視組