黃秋生恩師爆鵪鶉喊包學生
黃秋生演而優則教，和甄詠蓓開辦劇團，執教鞭開班授徒，恩師鍾景輝（King Sir）和毛俊輝更親自到場支持，在老師面前，秋生即時變得乖巧，King Sir更大爆讀書時代的秋生非常鵪鶉！而謝霆鋒、周杰倫、林嘉欣等亦有拍片祝賀。
藝人黃秋生和甄詠蓓開辦劇團「神戲劇場」，二人昨日在香港藝術中心舉行記招，宣布會開設名為「一點出發」的課程授徒，今年9月開學，一連7日，收費二萬元！
阿Sir訓話
秋生的恩師King Sir和毛俊輝亦有撐場，一向有火、敢言的秋生，在兩位老師面前難得乖巧，King Sir就大爆讀書時代的秋生是怕醜仔一名，非常鵪鶉，他又謂：「佢試過睇劇本睇到淚流滿面，落咗堂仲喊緊！」現場毛sir更教訓秋生：「你離開舞台劇太耐啦！係時候實踐吓！」秋生皆沒有駁嘴，全程表現聽教聽話，非常少見。
人緣極好的秋生更得一眾影視紅星拍片支持，包括謝霆鋒、周杰倫、林嘉欣等，嘉欣亦想做學生。而久未露面的梁洛施亦有錄音祝賀，她謂：「你哋將來開班一定要預我呢個學生！」
收火唔鬧
受訪時，秋生表示自己五十幾歲，是時候執教鞭，問到怕不怕自己會發火鬧走學生？他就笑言：「我收咗火啦！收咗錢，佢唔嚟仲好！（梁洛施復出？）佢好快會公布，等佢自己講。」他透露劇團明年將演出著名舞台劇《馬》（Equus），男主角現定為張敬軒，而哈利仔丹尼爾烈格夫（Daniel Racliffee）在英國演出該劇時有全裸演出，問到秋生軒仔是否同樣會全裸？他說：「我哋會嚴格考慮，睇吓點啦！」
文：影視組