張智霖玩女 冷落魔童
張智霖（Chilam）與蔡一智向來老友鬼鬼，前日兩家人齊齊到中環行街，一直想追多個女的Chilam只顧與「智女」China玩，反而囝囝魔童獨自行出馬路旁，阿智見狀即時捉實魔童。
袁詠儀（靚靚）自2006年為老公Chilam誕下兒子張慕童（魔童）後，兩公婆多年來一直想追多個女，有指求「女」心切的靚靚，除了祈求寧波車及以中藥調理身體外，年前更以月租約20萬港元，搬進淺水灣風水豪宅。恨女恨出面的Chilam曾表示會不設防造人，但近年兩公婆各有各忙，莫講話造人，就連湊仔都幾乎冇時間。
難得前日Chilam與老婆靚靚都在港，隨即帶同魔童及相約好友蔡一智一家三口到中環行街，與阿智一個餅印的「智女」China，全程乖乖拖住爸爸，而阿智的一歲兒子當晚則未有同行。約8時許，阿智太太周雪芳與囡囡入超市購物，其他人則於門外吹住水等，活躍的魔童冇時停走來走去，等齊人後，一行人乘電梯往下層取車。
追「女」未成功的Chilam，搭電梯時只顧與「智女」玩，又餵她吃東西，反而殿後的靚靚就與蔡太傾偈，而紮紮跳的魔童走到馬路旁邊，阿智見狀即上前把魔童拖回行人路，魔童乖乖的繼續拖住「智女」玩，其後一行人齊齊登上Chilam的四驅座駕離開。
對《衝上雲霄II》有信心
而昨日Chilam現身無綫開工，提到《衝上雲霄II》即將播出，他表示：「好期待，之前配音時睇咗5集，自己都好鍾意，唔會擔心收視。」對於林子祥為該劇唱主題曲，劇集未出街已接獲51宗投訴，指歌曲不配合，他笑言：「史無前例，證明大家都關心套劇，可能觀眾先入為主啫！」
文、攝：追蹤組