唯唯捱插變獲讚 網民鬧爆
無綫藝員「自己人」玩晒的歌唱比賽《星夢傳奇》，盛傳是內定三甲的梁烈唯（唯唯）早前比賽錄影時唱到走晒音，當場被巫啟賢狂插唱得一塌糊塗，巫啟賢又劣評黃智雯聲音又乾又窄。不過，到前晚節目正式出街，無綫錫晒一對「親生仔女」，劣評統統被剪得一乾二淨，由彈變讚，令網友熱論此舉不公平。
藝員梁烈唯不用試音直入無綫歌唱比賽《星夢傳奇》而被盛傳是內定三甲，早前打頭陣與黃智雯、張名雅、袁偉豪、羅鈞滿、張景淳和鄭俊弘錄影第一集，由巫啟賢、葉蒨文、郭偉亮、周啟生擔任「星級評判」。當日錄影時唯唯演繹陳百強名曲《等》，但唯唯唱得麻麻，明顯走音兼入錯key，當場被評判插得體無完膚，最狠的是「百彈齋主」巫啟賢，他批評唯唯唱歌時拍子感一塌糊塗，簡直是毀滅了陳百強的名曲，加上對歌曲以為熟悉，實是不明曲意在「盲唱」，巫啟賢狠狠地給了唯唯一個超低分數。而唱《愛是最大權利》走晒音的黃智雯也被巫啟賢批評聲線又乾又窄，黃智雯還想抵賴是第一次唱該曲，引來被眾評判圍插沒有好好準備參賽。
但到前晚《星夢傳奇》第一集正式播出，經無綫悉心剪接後，唯唯與黃智雯被評判喪插的片段全部被剪得一乾二淨，還美化成由踩變讚，無綫對一對「親生兒女」果然錫到燶。前晚節目中巫啟賢狠插唯唯的尖酸批評全部一句不留，連唯唯自認「破音」的片段也消失。
黃智雯幫公司解畫
「實至名歸」以整晚最低分出局的黃智雯唱歌多次走音，加上五音不全，實在令觀眾一邊看一邊打冷震，但經無綫一剪後巫啟賢火辣批評被降溫，巫啟賢說：「你唔了解自己把聲，其實你係女中音，你最吸引人嘅地方係中音。」無綫將評判劣評全部剪走，連觀眾也能輕易聽出的走音變成隻字不提。黃智雯接受電話訪問對於評判劣評被剪，她說：「可能係要剪接成一個鐘嘅節目，同埋公司想效果正面，營造出我哋努力練歌嘅一面。」包尾出局的智雯又謂獲高層樂易玲鼓勵。另外，雖然唯唯劣評如潮，但亦有知音，亢帥克在微博晒與唯唯合照說「好正呀，加油！」唯唯則回應「謝謝你的鼓勵！我會努力改進。」
《星》前晚出街後引起網民討論，不少網友指無綫不公平，有網友說：「關二哥（唯唯）唱得咁難聽，啲評判都讚佢，之前報道話巫啟賢插得佢好勁，仲以為會播嗰段出街，但出街又冇，係咪無綫將啲難聽評語剪晒。」觀眾對節目質疑邊鬧邊睇，首集有平均21點，較上周同時段的收視上升5點，約有139萬觀眾捧場，收視理想。
巫啟賢尊重刪剪權
而唯唯接受電話訪問時表示：「當然係原汁原味出街好啲，有批評會樂於接受，我自問唔係唱得好好，但已經盡咗力。」被指是內定三甲的唯唯可覺得無綫偏心他？他說：「咁又唔係淨係cut我，個個都有cut，公司點樣剪我就唔清楚。如果係有內定評判直情唔會彈我啦，話我冇所謂，唔好侮辱啲評判影響佢哋聲譽。」至於巫啟賢則表示：「我做了該做的評論，剪輯權是電視台的，我會尊重。」
採訪：影視組