妙芝凱婷親子寫真見證成長
書展即將開鑼，一眾ｏ靚模又來個埋身肉搏，已成為書展一大特色。原來不少明星名模也曾閃過一刻拍寫真的念頭，好像梁漢文就想出「股」惑寫真，自信古銅靚股值100分。至於媽咪級的名模歐陽妙芝和藝人朱凱婷，均希望可以跟子女一同拍寫真，記錄子女的成長歷程。
《FANCL活動》
黃婉曼：「想出本講煮嘢食為主題嘅寫真，我好鍾意煮嘢食，其實我覺得烹飪好sexy。至於拍攝地方好緊要，例如整沙律就喺田園，煮海鮮就喺沙灘。」
周汶錡：「影大肚寫真，想拍低懷孕過程。好多孕婦都會水腫，希望自己唔會，想做個靚嘅大肚婆！唔一定唔着衫，我希望我個寫真係fashionable、有型，又或者着晚裝elegent啲。」
《製作公司周年慶祝活動》
歐陽妙芝：「曾幾何時自己都出過寫真，嗰時係同樂基兒喺沙灘影，當時佢仲係新人，上身都冇乜點着。如果再出寫真，我諗會同囝囝一齊影，囝囝嘅寫真可以作為回憶，叫做未發育完全寫真，哈哈！」
朱凱婷：「會出親子寫真，同囡囡一齊影，囡囡好細個已經成日同佢影啲健康又有少少性感嘅相，好似出浴照，等佢大個畀佢睇番，記錄佢嘅成長歷程。」
梁漢文：「要我揀全身邊度可以露就係屁股啦，我會影露股寫真，皮膚夠滑又夠圓，起碼值85分，練到好挺嘅話就有90分，如果曬到古銅色就值100分。」
《護膚品牌活動》
鄭嘉穎：「如果影寫真，我唔想除衫，想影一輯以旅行為主題嘅寫真，最好去希臘，因為未去過，覺得嗰度好靚，可以寓工作於娛樂。」
《新車揭幕禮》
鍾嘉欣：「嚟緊書展我真係會出寫真，係以幸福為題，影低我同啲小朋友玩嘅開心時刻。」