高皓正張文慈鬥苦

選擇高調老婆撐

張：其實你點睇人哋話你喺宗教問題嘅言論出位同高調呀？

高：咪就係睇你點睇囉。我係高調，但唔係每個人都可以做得到。或者咁講，藝人唔係家庭主婦、唔係學生哥，因工作關係係需要高調嘅，有啲藝人高調去宣傳佢哋嘅CD、劇集、品牌，但呢啲嘢唔係天長地久嘅，我只係希望憑自己喺信仰上嘅堅持同執着，向社會發放能量，喺呢方面做個高調嘅藝人啫。

看見高皓正有個幸福家庭，張文慈也感欣慰。

張文慈靠宗教信仰重建自信心。

持開放態度講性

張：你對性嘅睇法，亦曾經惹起部分同行嘅反對聲音喎。

張文慈向高皓正講及童年經歷不禁落淚。	高皓正早前被外界狂插，幸得太太支持。（資料圖片）	高皓正與一班基督徒藝人關係密切。

高：可能香港人喺呢方面比較敏感，「性學」嚴格嚟講係一門學問，但大家一提到就將佢等同為「鹹濕」，如果正視佢，可以令心理健康同預防性病。我唔明點解大家教小朋友，鍾意用「菇菇」同「鴨仔」等嘅詞彙代替性器官，我囡囡得歲幾，呢方面我會持開放態度去教育佢。

張：面對外界抨擊，你屋企人點睇？

高：太太從來冇懷疑過我，仲好支持。打個比喻，我太太係醫生，睇病有張check list，普通病人佢會做足上面寫住嘅10樣嘢，但對我，佢會額外細心，check list外會加多一杯熱水同一個kiss。

單親家庭有缺陷

張：我覺得自己宣稱係基督徒後，好容易喺所有行為上都被標籤咗，同一件事，外界嘅批評會無限擴大，好似朱茵嗰件事（未婚懷孕），名副其實承受緊基督徒嘅壓力，我諗你同我都好清楚明白。好開心依家你有個幸福家庭，撫心自問，你以前嘅戀愛史稱得上好精彩，你係咪一個好需要愛嘅人？

高：我媽媽喺我六歲嗰年過身，幾個家姐一直喺外國生活。我跟爸爸大，成長嘅過程屋企成日得我一個人，嗰份孤單同不安感，令我天真地以為拍咗拖就搞得掂。

張：我都係單親家庭嘅。講啲秘密你知，我細個嗰陣極度自卑，連家姐出街我都會發好大脾氣，覺得佢做乜要丟低我。早排啲韓日電影好鍾意描述學童遭欺凌事件，我就係活生生嘅例子，可能細個我生得唔夠可愛，喺學校附近遇到班壞人，佢哋好鍾意玩我，當時真係見一鑊打一鑊，佢哋試過罰我喺個圈入面執垃圾，期間唔准流一滴眼淚，如果犯規，我會「死」得好慘。

靠宗教重拾自信

高：嘩！點解唔同屋企人講？

張：爸爸湊住我哋幾兄弟姐妹，仲要返工搵食，好多時都理唔到咁多。最嚴重嗰次，佢哋捉咗我上架巴士度有所行動，咁啱有人經過幫我報警，爸爸嚟到警署，以為我跟住班壞人。我覺得有冤無路訴，以後就冇再出過聲。聽啲朋友講，嗰班人依家仲周圍同人講，話以前蝦過我。自從認識主之後，我覺得自信心好咗好多，亦好多謝一班主內弟兄姐妹愛護。

高：人哋話圈中人爭名奪利，我覺得我哋一班信主嘅藝人，根本冇分大細，係真正彼此關心。好似韓馬利同關心妍咁，佢哋喺經濟層面等各方面，都好幫助啲新入行嘅後輩，等大家可以堅持自己嘅理想。我有受過佢哋嘅恩惠，亦希望目己有能力，可以幫助番其他人。

後記

幻海奇情

縱使別人質疑高皓正早前的「驅魔論」，受訪當日提起批評他仍一面從容。不經意談到高皓正的宗教著作，他更抽出一個章節來分享：「我有提到有日我電話響，因為接唔切，我根據來電顯示打番轉頭，接聽嗰個係施明姐，但佢話從來冇打過畀我，如是者電話響咗兩次。其實電話響之前我腦內忽然有想幫佢一家祈禱嘅念頭，於是咪問施明姐可唔可以幫佢祈禱，跟住咪做囉。」儘管事件耐人尋味，不過行事但求心之所安，也不必深究。