朱玲玲笑認晶晶佗慈姑椗
去年下嫁霍英東長孫霍啟剛的郭晶晶將於八月為霍家誕男B，將榮升嫲嫲的朱玲玲在活動中，難掩喜悅之色，被問到晶晶生慈姑椗，她笑得燦爛不作否認，而見到大肚婆蔣怡更表現關懷，捉住她的手傾個不停。
跳水公主郭晶晶與霍啟剛結婚後，很快已傳出喜訊，將於八月為霍家添男丁，更獲霍家送贈二億元獨立屋。快將榮升嫲嫲的朱玲玲昨日出席「生息藝術展2013」展覽時，遇上同場懷孕逾九個月的準媽媽蔣怡（Coco）時，未知是否想起快有孫抱，顯得零舍開心，捉住Coco雞啄唔斷，心情大靚。
晶晶懷有蛇B一直成熱門話題，朱玲玲被記者追問晶晶是否佗男B？她四萬咁口，不作否認，開心地說：「今日唔講呢啲，（係咪八月預產期？）我冇嘢講，我要睇畫。（改咗名未？）唔答，多謝。（有冇幫手改名？）冇，冇，冇講呢啲。」朱玲玲一直避開記者追訪，再問到有否教晶晶特別注意的事項？她回應：「唔講佢哋，等佢哋自己講番自己嘢。」當記者說嫲嫲講兩句啦的時候，朱玲玲更笑得特別開懷。
蔣怡老公陪產女
蔣怡表示下周將在東區某醫院分娩，對於大肚裸照非常大膽，Coco表示：「咁樣靚啲，個個都話見唔到個肚，就畀大家睇晒啦！」她表示B女十分活潑，經常被踢肚：「我重咗8kg，日日食補品。」問到老公翁狄森會否陪入產房，她說：「佢話會，不過可能未入就暈咗，要我氹番佢！」翁狄森表示已為B女改好中文名，但暫未能透露。
同場有份策劃展覽兼畫家之一的楊素珊，表示希望藉此把環保訊息帶給大家，大讚其他藝術家十分熱心：「早兩年已經喺北京同上海舉行種下種子，依家播到香港，希望下站係台灣，傳播晒中、港、台。」
文：名人組