黃偉文巴黎睇騷幫祖兒入貨
【劉慰思巴黎直擊】黃偉文（Wyman）前日現身巴黎欣賞Valentino與Carven時裝騷，他直言到巴黎睇騷多年，今次任務重大，會身體力行支持中國設計師：「中國好多設計師都好有才華，而我咁多年都不斷睇外國設計師，今次會多着中國設計師啲衫，為佢哋宣傳吓。」
至於好友陳奕迅的演唱會快將舉行，問到有否被託買歌衫？他笑說：「佢大把人幫，佢冇發出求救，搵親我都係嗌救命時候，而容祖兒就有叫我今次嚟巴黎同佢買衫，我唔知買幾多套，見啱就會買，我一路幫佢行名店之餘，亦同時幫佢上網買，真係活喺現實同虛疑世界。」
他又笑言：「我每次唔喺香港去睇時裝周，都會咁啱撞正佢哋將會開演唱會，好似何韻詩嚟緊十月會開，不過聽聞有個好出名設計師為佢設計歌衫。（你係佢形象指導？）唔算，但一班朋友舉行演唱會，自己都好希望可以參與，我之前舉行嗰個演唱會，個個都覺得我搞演唱會兼歌衫得，搞到班朋友一開演唱會都會搵我安排，我變得好似係新陳淑芬，又或者係正氣嘅陳淑芬！」