李嘉欣老公送禮 至緊要實際
大美人李嘉欣剛撇下愛子，與夫婿許晉亨到日本賀壽，囝囝越洋錄生日歌送給她，她笑言甜蜜過戀愛，她又謂囝囝十分「大男人」，精力充沛兼管制，難怪嘉欣聞再生B即時say no﹗
昨日李嘉欣戴上逾千萬元珍珠首飾出席Mikimoto 120周年慶祝酒會及圓方新店隆重開幕活動，她透露剛過去的生日跟老公許晉亨二人世界去了日本東京，問囝囝小JM可有表示？她笑說：「我助手錄低個仔唱生日歌，然後畀我聽，佢仲話『I love you forever』，我開心過談戀愛！（老公送咩禮物？）我之前話過想要咩，佢仲搵緊份禮物，（唔要驚喜？）都五年唔使驚喜要實際，有時買咗份禮物要扮鍾意好辛苦。」
皇帝仔係大男人
記者笑問可有趁旅行relax順道造人？她即說：「講起呢個問題就唔relax，香港養個小朋友好恐怖，我媽咪有問過我老公生唔生多個？老公即刻話『No，thank you！』，佢enjoy做爸爸，但做港爸太大壓力，個仔朝早會拎住大聲公同咪叫佢起身，佢六點幾就起身，會話我瞓得多，如果我哋兩個唔係咁緊張會好啲，佢係一個好爸爸，亦係好老公，對囝囝付出好多，對我好係習慣！」嘉欣又笑謂「皇帝仔」十分「大男人」，會跟她說「Mom，no work」，如果她工作後回家，更會黑臉；她又否認是怪獸家長，會為兒子選擇傳統本地學校。
文：名人組