李思欣讚老公 絕種好男人

李思欣早前與友人大搞網上鑽石生意，老公范振鋒（Ricky）更願意不收分文為她擔任模特兒拍鑽石廣告。思欣激讚老公「絕種好男人」，除了因為對方願意為自己擔任義務模特兒外，更會「隨時報到」兼「遇女即彈」：「娛樂圈出名靚女多、誘惑多，最初我都怕老公會定力唔夠，不過好彩佢畀咗好大信心我，依家佢去邊都會預先同我報到，試過出街飲嘢時有女仔flirt（挑逗）佢，佢會自動彈開，仲會即刻打電話話畀我知，有時仲叫埋我一齊去飲嘢，以防我喺屋企亂諗嘢！」

阿媽代煲湯

不少夫妻婚後都嚮往二人世界，拒絕與老爺奶奶又或岳父岳母同住，不過思欣就慶幸Ricky願意為自己與岳母同住：「我由細到大同媽咪都好close，因為爸爸要返大陸做生意，成日都得番我同媽咪兩個人，結婚之後Ricky怕我媽咪一個人住唔慣，所以就接受同我媽咪一齊住，有好多朋友都話依家十個男人有九個都唔肯同岳父岳母一齊住，所以Ricky肯咁做真係好難得！」她又補充：「最難得嘅係佢哋都好就得對方，平時都無咩拗撬，媽咪仲會代我煲湯畀老公飲！」

李思欣大讚范振鋒是好老公，不受外界誘惑。

李思欣得老公疼錫之餘，與老爺奶奶都相處融洽。

採訪：李佩珊

攝影：吳文聰

場地：MM/H @ 皇室堡