Bosco 夥拍Niki「友」火花

黃宗澤（Bosco）、周麗淇（Niki）相隔7年再聚頭，二人在劇集《好心作怪》內首度飾演情侶，同是單身的他們甫開劇即傳出緋聞，對此，Bosco搞笑指着Niki說：「最衰係佢啦，麻鬼煩，冇拍拖！（你都係！）咪當做吓劇宣傳囉。（你拍劇都同女主角過電？）多謝，唔好搞我啦，畀我靜靜地過吓活啦！（空穴來風，未必冇因？）同事啫。」再問在他的「緋聞樹」當中有沒有一些是真時，他即擰頭：「呢個世界唔係男就係女o架啦，睇下幾時傳我gay，男都啱埋，咁就威水喇。」而Niki亦異口同聲否認緋聞：「我哋都單身，所以大家好自然想我哋一齊，今次傳得好夾硬。」

互數拍劇趣事

兩人表示拍劇後成為好友，期間更發生不少趣事！Niki說：「我同佢咩都會講，Bosco好聰明，我覺得佢會係第日嘅視帝，同佢做對手戲好有火花，佢會諗好多新嘢！」Bosco聞言亦說：「咁抬舉我！佢咪第日嘅視后囉，佢好照顧身邊嘅人，好似佢會走嚟幫我襯埋衫。」Niki解釋：「因為我同佢做情侶，要諗吓畫面，畀觀眾覺得我哋好恩愛、好sweet。」Bosco又大爆Niki成日請他食「丸仔」：「佢仲要關心埋我哋健康，成日擺低啲補藥，話對捱夜好，去肝火。」

大談擇偶條件

自與胡杏兒分手後，Bosco雖然桃花不絕，但還未有一朵能開花結果，談到擇偶條件，Bosco只求順其自然：「冇一個特定標準，我又唔係好想拍拖，咁多嘢做！啲friend都話介紹女仔我識，我話唔使。（因為你大把？）唔係大把，係唔想住，冇感覺想要個女朋友，做吓嘢先。」

談到Niki姊姊周汶錡去年下嫁法籍老公，Niki卻希望另一半是中國人：「其實我都冇拍拖一段時間，但我又唔係好恨嫁，所以都唔知係好事定壞事，只係唔想隨便搵一個。（條件？）會隨住自己年紀，想法都會唔同。」

髮型：Kel Fung@hair.nail

化妝：Cyrus LEE

服裝：initial

文：影視組