唯唯戀苟姑娘自製床戲
藝人馬德鐘、鍾嘉欣、梁烈唯、苟芸慧等，昨日在將軍澳電視城為新劇試造型，男主角馬德鐘更被安排壓軸出場，最近他與無綫轉部頭合約，他表示能為無綫拍劇感到開心：「簽咗兩年，每年一部！」另嘉欣ＢＢ透露將演躁狂又暴力的角色。
而緋聞男女唯唯和苟姑娘在劇中將飾演夫妻，唯唯謂：「我哋結咗婚，仲發生埋關係！」問到苟姑娘只當他是水泡，唯唯就笑言憑他一身肌肉，頂多是浮板，不是水泡。講到二人在劇中會否有親熱戲時，唯唯就抵死自製床戲騷肌：「我露胸肌，跟住苟姑娘挨喺我心口睇電視！（使唔使用手遮遮粒點？）唔使，我嗰點好靚o架！加埋打燈，肌肉啲紋理出晒嚟，苟姑娘閃亮嘅眼睛同我嗰點一齊！（點對點？）係呀！」
