樂易玲生日P 契仔no show

下月一日踏入54歲的無綫高層樂易玲前晚在中環舉行生日派對預祝生日，近百藝人包括佘詩曼、胡杏兒、湯盈盈、陳百祥、苗僑偉、吳卓羲、謝天華、丁子高、老闆陳國強等到賀。雖然星光熠熠，但樂易玲向來愛錫的三大「契仔」林峯、黃宗澤和鄭嘉穎卻未見蹤影。三大「契仔」冇心肝，好在還有近期在清遠拍攝《巾幗梟雄之諜血長天》的「親生女」胡杏兒，她不惜千里趕回港賀壽，而即將回巢的佘詩曼也禮到人到，樂易玲總算有點安慰。

杏兒特地由內地趕回港出席派對。	佘詩曼透露明年返無綫拍劇。	鄭嘉穎現時致力北上掘金，有job才會回港。
林峯與吳千語蜜運中，戀愛大過天。

黃宗澤請食飯補數

杏兒前晚到賀後隨即趕回內地繼續開工，問她送甚麼生日禮物給樂易玲？她說：「樂小姐話唔准買禮物！」杏兒透露最近在清遠拍劇難頂37度酷熱中暑：「可能唔熱得啦！又戴住個頭套，中暑作嘔好辛苦，食咗中藥瞓咗一覺好彩冇乜事。」

而黃宗澤接受電話訪問被問到何故不出席？他說：「尋晚拍《貓屎媽媽》拍到兩點嚟唔到，已經SMS咗樂小姐話開工嚟唔到，佢都好體諒叫我如果早收工就嚟啦。（避舊愛杏兒？）我都唔知有邊個去。」黃宗澤指不擔心激嬲樂易玲，會稍後請食飯補數。

林峯則透過經理人回應指因在內地拍劇未能出席，稍後會與樂易玲補吃生日飯，鄭嘉穎則因身在台灣拍攝新歌MV未能出席。今年到賀樂易玲生日的藝員大多是「兩手空空」，原來是樂易玲「下令」不許送禮。而曾與她傳不和的馬德鐘亦有到賀？樂易玲說：「從來都冇事，佢係我生日會鐵腳嚟！」

採訪：影視組