AOA細孖 興奮拍無綫劇
歌手鄒文正（Terry）昨日率領師妹孖女組合AOA出席《「愛職安‧愛家庭」巡迴小學探訪活動2013》，看到一班表現活躍的學生，Terry慨嘆兒時太怕醜，入行後都被人話太cool，兩位師妹亦有同樣感覺，但他稱自己只是慢熱，會努力改善，他又透露近日正在拍電影，將演富家子弟。
反之AOA大孖吳燕珊（大Ann）笑言自己童年時已經充滿表演欲，在學校會爭住舉手參與活動，又謂小朋友百厭是好事，代表他們有童真，提到細孖吳燕菁（細Ann）即將在無綫開劇，她說：「就快開拍，又興奮又緊張，呢排都有睇多啲戲，同埋讀熟啲劇本（仲會唔會飛紙仔？）唔使喇，今次有晒劇本，知道晒個角色係點。」