馬浚偉感恩慶幸冇盲
藝人馬浚偉前晚拍劇受傷入院治理，左邊鼻樑骨折及左眼腫了，故要暫時停工休息，他坦言幸好今次傷及的是左眼，2006年拍劇時同樣發生意外曾令眼角膜受傷的他，坦言若再撞傷，分分鐘失明，故今次傷得感恩。
前晚馬浚偉拍攝劇集《守業者》發生意外，被道具槍擲中傷及鼻樑及眼眉，即時血流如注，監製梁材遠即時陪他入院醫治，處理好傷口後馬浚偉已出院，監製更送他上的士，在家休息的他，待傷口痊愈及眼角消腫才可正式復工。
拍檔緊張心甜
記者昨日致電馬浚偉問及傷勢時，他坦言左邊鼻樑骨折及左眼眉因之前爆了，現在也腫了，他說：「尋晚瞓覺左邊鼻都塞，因為之前流鼻血同裏面損咗，受傷嗰陣都有少少暈，我都坐咗好耐先回到神，真係流咗成攤血，十分鐘後先識叫助手攞塊鏡畀我照吓，不過受傷嗰一刻都好心甜，因為楊怡又幫我抹汗、印血，曹永廉又斟水畀我飲，佢哋都好緊張。」
問到誰是「真兇」？馬浚偉坦言唔關拍檔事：「劇情講佢正面攞支槍對住我，我就起右腳踢甩佢支槍，佢再一拳打落我度，當時我都踢得幾大力，佢手指仲勾住支槍，最後成支槍飛埋嚟！」他又感恩的說今次左眼受傷已很幸運，若擊中右眼可能隨時會盲：「事關2006年我拍《天機算》時都畀隻馬撞傷入院，右邊視網膜撞到鬆咗，如果今次撞番右邊，視網膜好容易脫落，肯定盲眼。」
留疤痕仲有型
至於何時復工要五日後視乎情況而定，馬浚偉現時要好好休息，不可太大動作，睡覺都要很小心：「原本星期六（29日）會出席林以諾牧師嘅show，不過唱歌運氣都有影響，可能唱唔到，只會捧場。」
另方面，昨日馬浚偉將自拍傷口照片放上微博，叫大家放心，還笑言：「疤痕唔會太深，有都幾有型！」
另外，林保怡昨日亦於微博表示拍戲時被裝在牆上的反應彈彈中後背及右手，不過只是小傷，叫大家不用擔心。
文：影視組
攝影：追蹤組