求愛處男溝梁麗瑩 盡在「掌」握

無綫配對節目《求愛大作戰》捧紅一班求愛男，大隻仔Cyrus承認與導師Queenie約會中，但29歲處男Thomas仍是孤家寡人，Cyrus遂充當媒人，給他介紹無綫小花好友梁麗瑩（Davily）。日前三人被發現在九龍塘行街，戴上隱形眼鏡的Thomas型仔不少，果然有備而來。

早前在劇集《神探高倫布》演蕭正楠老婆而人氣攀升的Davily，懶理被途人認出，先與Cyrus帶Thomas買男裝改變形象，又將恤衫放在Thomas身上左拼右拼及戴帽，非常體貼，令怕醜仔Thomas登時硬軚！但在Davily主動撩傾偈下，Thomas表現熟落不少，除帶Davily買女裝頭飾，三人到餐廳醫肚時，他更為Davily睇掌，成功摸到女神玉手，兩人又親熱貼臉自拍，Thomas有望「開齋」！事後Davily在電話中說：「我同Cyrus識咗十幾年啦！今次係第一次見Thomas，印象幾好，幾nice又搞笑！（發展可能？）冇咁快啦！做朋友先。」

Davily幫Thomas戴帽，Cyrus（右）眼甘甘。

Thomas與Davily甜笑自拍，完全當Cyrus透明。

Karl拒絕脫毛

此外，最近同樣憑《求愛》人氣急升的「綠魔」許嘉浩（Karl），昨日為清談節目任嘉賓，被問到節目中導師Queenie同參賽者Cyrus是否真拍拖？他說：「問番佢兩個，總之聚會入面係有一pair係真心交往緊。最後一集會搵佢哋100位親友到場見證。」談到外間對其性別很有興趣，Karl不諱言有公司欲贊助他脫毛，但已遭他拒絕：「我又唔係做女仔，我覺得女人生仔好痛，做男仔舒服得多。」

文：影視組